पछिल्लो समय यही जेठ १४ गते गुलरिया ५ बालापुरमा चितुवाले आक्रमण गर्दा एक बालिकाको ज्यान गएको छ । बालिकालाई चितुवाले आक्रमण गरेपछि यस क्षेत्रका आम नागरिकहरुले नागरिक सुरक्षा र उचित क्षतिपूर्तिको माग गर्दै जिल्ला प्रशासन कार्यालय अगाडि प्रदर्शन गरका छन् । सुरक्षा र क्षतिपूर्तिप्रति स्थानीय प्रशासन सम्वेदनशील देखिएपछि प्रदर्शन रोकिएको छ तर जनताको चासो र समस्या टड्कारो छ । बन्यजन्तुबाट नागरिकहरुले बर्दिया जिल्लाभर निरन्तर जनधनको क्षति व्यहोर्नुपरेको छ । बाघ, हात्ती र चितुवाको आक्रमणबाट नागरिकको ज्यान गएको छ, धेरै नागरिकहरु घाइते तथा अंगभंग छन् । बर्दिया राष्ट्रिय निकुञ्ज क्षेत्र र त्यस निकट मध्यवर्ती क्षेत्रमा जंगली जनावरको आक्रमणबाट हुने मानवीय र भौतिक क्षति धेरै नै छ । पछिल्लो समय निकुञ्ज क्षेत्रभन्दा बाहिरका गाउँ तथा बस्तीमा पनि जंगली जनावरको आक्रमण बढ्न थालेको छ । एक प्रकारले पुरै बर्दिया जिल्लाभरि जंगली जनावरको आक्रमणका घटना बढन थालेका छन् ।
जिल्लामा जुन प्रकारले बाघ र चितुवाबाट मानिसहरूलाई आक्रमण हुने क्रम बढेको छ , त्यसलाई रोक्ने तथा नागरिकको सुरक्षा प्रबन्ध गर्न सक्ने प्रभावकारी योजना ,रणनीति तथा जन–शक्ति स्थानीय प्रशासनसँग छैन । अहिले सदरमुकाम गुलरियामा छ्याप्छ्याप्ती चितुवा देखिन थालेको छ, केही समय अगाडि सन्तोषी टोल क्षेत्रमा चितुवाको आक्रमणबाट एक बालिका ले ज्यान गुमाएकी थिइन् । यस अघि बबई बहुमुखी क्याम्पस परिसरमा चितुवा देखिदा त्यो क्षेत्रमा सन्त्रास छाएको थियो । जिल्ला सदरमुकाममा बाघ वा चितुवालाई नियन्त्रणमा लिने जनशक्ति र प्रबिधि दुबै कुराको उपलब्धता छैन । अहिले हाम्रो सामु यो समस्या चुनौतीको रूपमा देखा परेको छ । सदरमुकाम छेउछाउमा बढ्दो बन क्षेत्र, उखु लगाएत केरा खेती, सीमावर्ती क्षेत्र भारतमा घना जङ्गल आदि कारणले अहिले यो क्षेत्र जंगली जनावरको ओहोरदोहोर हुने क्षेत्र बनेको छ । चुनौतीको रूपमा देखिएको जंगली जनावरबाट जनधनको क्षति र त्यसबाट सुरक्षा अहिले हाम्रो लागि चुनौती बनेको छ । यो समस्याको स्थायी र दीर्घकालीन समाधान खोज्न सरोकारवाला पक्ष समयमै कृयाशील हुन आवश्यक छ ।
