जनकपुर । प्रधानमन्त्रीमा नियुक्त राष्ट्रिय स्वतन्त्र पार्टी रास्वपाको संसदीय दलका नेता वालेन्द्र साह बालेनको महोत्तरीस्थित पुर्ख्यौली गाउँ एकडारामा आज उत्सव मनाइने भएको छ ।
बालेनले आज प्रधानमन्त्रीको शपथ ग्रहण गर्ने भएको र यस अवसरमा बालेनको गाउँवासीले खुशीयाली मनाउने तयारी गरेका छन् । दुई दिन पहिलादेखि नै एकडारा गाउँपालिकाका गाउँवासीहरु आजको दिनलाई भव्य उत्सवका रुपमा मनाउन जुटेका छन् ।
कसैले मिठाईका परिकार तयार गरेका छन् भने कसैले पटका र आतिशबाजीको तयारी गरेका छन् । बालेन प्रधानमन्त्री हुने भएपछि सम्पूर्ण एकडारावासी हर्षित छन् ।
एकडारा गाउँका बच्चादेखि वृद्धसम्म सबै खुशी छन् । स्थानीय सुशीला देवीका अनुसार आज उनले गाउँमा रंग अबिर खेल्ने र बेलुकीपख हरेक घर एवम् चोकमा दियो बाल्ने बताइन् ।
अर्का स्थानीयवासी अरुणकुमार साहका अनुसार बालेनले विगतदेखि नै गर्दै आएको कामले एकडारा गाउँको नाम देशभरि चिनाएको छ । बालेनले हालसम्म आफ्नो गाउँको लागि केही नगरे पनि उनको बुबा, हजुरबुबाले गाउँको विकासका लागि उल्लेख्य कामहरु गरेका छन् ।
बालेनले गाउँ आउने वाचा गरेको र एकडारा गाउँको लागि पनि पक्कै नै विकासका कामहरु गर्नेमा विश्वस्त रहेको साहले बताए ।
एकडारा गाउँको लागि आजको दिन गर्वको दिन रहेको स्थानीयवासीहरु बताउँछन् । एकडारा महोत्तरीको सदरमुकाम जलेश्वर हुँदै बर्दिवाससम्म पुग्ने मुख्य वैकल्पिक बाटो भएकाले, आज यहाँ हुँदै आवतजावत गर्नेहरुलाई लड्डु खुवाउने स्थानीयहरुको भनाइ छ ।
उनीहरुले आज गाउँभरि दिप प्रज्ज्वलन गर्ने बताएका छन् । बालेनले आज प्रधानमन्त्रीको शपथ ग्रहण तथा पदभार गर्ने भएका छन् । हालै सम्पन्न प्रतिनिधिसभा सदस्यको निर्वाचनमा बालेनले झापाबाट नेकपा एमालेका केपी शर्मा ओलीलाई उनकै क्षेत्रबाट हराएर जित हासिल गरेका थिए ।
साभार हाम्राकुरा
