जुम्ला/ कर्णाली प्रदेशको प्रसिद्ध धार्मिक स्थल जुम्लाको चन्दननाथ र भैरवनाथ मन्दिरमा घटस्थापनाको दिन परम्पराअनुसार नयाँ लिङ्गो फेरिएको छ। सोमबार चन्दननाथ मन्दिरमा ५२ हातको र भैरवनाथ मन्दिरमा ४८ हातको नयाँ लिङ्गो ठड्याइएको हो।
चन्दननाथ–भैरवनाथ मन्दिर गुठी व्यवस्थापन समितिका अध्यक्ष अमरबहादुर थापाका अनुसार, मन्दिरमा लिङ्गो ठड्याएपछि मात्रै जुम्लावासीले आ-आफ्नो घरमा घटस्थापना गर्छन्। वर्षमा ५२ हप्ता हुने भएकाले वर्षभरि देवीदेवताले प्राकृतिक विपद्बाट रक्षा गरून् भन्ने विश्वासका साथ ५२ हाते लिङ्गो राखिने प्रचलन रहेको छ।
लिङ्गो फेरेसँगै चन्दननाथ–भैरवनाथ मन्दिरमा मार्सी धानको सिक चढाउने परम्परा रहेको छ। यसले मार्सी धानको उत्पादन वृद्धि र किसानमा उत्साह बढाउने विश्वास गरिन्छ।
दशकअघिसम्म कर्णाली अञ्चलका विभिन्न जिल्लाबाट मन्दिरका लागि धार्मिक सामग्री पठाउने परम्परा थियो। जुम्लाबाट अन्न र पैसा, कालीकोटबाट बाबियो, घिउ, मह, हुम्लाबाट ठेटुवा र मुगुबाट मास, मुगी दाल, राडीपाखी लगायतका सामग्रीहरू ल्याइन्थ्यो। तर, अहिले यो परम्परा रोकिएको मन्दिर गुठी समितिका कार्यालय प्रमुख रत्नप्रसाद आचार्यले बताएका छन्।
मन्दिरको माटो लगेर यहाँका स्थानीयले घरमा जमरा राख्ने प्रचलन रहेको छ, जसअनुसार सोमबार स्थानीयहरूले घरघरमा घटस्थापना गरेका छन्।
