जुवातास खेलिरहेको अवस्थामा नगदसहित दश जनालाई प्रहरीले पक्राउ गरेको छ ।
बाँसगढी नगरपालिका–३ शान्तिपुर स्थितबाट जुवातास खेलिरहेकाहरुलाई मंगलबार राति प्रहरीले पक्राउ गरेको हो । बाँसगढी नगरपालिका–३ शान्तिपुरस्थित खिमबहादुर महतको घरमा जुवातास खेलिरहेको भन्ने सूचनाको आधारमा ईलाका प्रहरी कार्यालय मोतिपुरबाट खटिएको प्रहरी टोलीले उनीहरुलाई नियन्त्रणमा लिएको जिल्ला प्रहरी कार्यालय बर्दियाका प्रहरी नायब उपरीक्षक चक्रबहादुर डमरपालले जानकारी दिए ।
जुवा खालबाट नगद ५४ हजार ३ सय १५, २ गड्डी तास र ५ वटा मोबाइल बरामद गरेको प्रहरी नायब उपरीक्षक डमरपालले बताए । पक्राउ पर्नेमा बाँसगढी नगरपालिका–३ शान्तिपुरका १८ वर्षीय सौगात खड्का, ३१ वर्षीय साजित गुजर, २८ वर्षीय अनुप खड्का, ३३ वर्षीय लोक बहादुर खड्का र ४१ वर्षीय राम शरण थारु रहेको डमरपालले जानकारी दिए ।
यस्तै सोही ठाउँका ६० वर्षीय खिम बहादुर महत, ३९ वर्षीय भुपेन्द्र डाँगी, ५१ वर्षीय रामु खड्का, ३० वर्षीय विजय कुमार खड्का र २५ वर्षीय धिरज कुमार खत्री रहेको डमरपालले बताए । उनीहरुलाई बुधबार जिल्ला प्रशासन कार्यालयबाट ७ दिनको म्याद लिई थप अनुसन्धान भइरहेको जिल्ला प्रहरी कार्यालयका डीएसपी डमरपालले जानकारी दिए ।
