एक विद्यालयमा अध्ययनरत बालिकाले जन्मदिनमा आमाले कपडा किन्न दिएको पैसाले विद्यालयका साना भाईबहिनीहरुलाई शैक्षिक सामाग्री सहयोग गरेकी छिन ।
जनचाहना आधारभूत विद्यालय डुम्रेनी ठाकुरबाबा नगरपालिका बाड नं १, कक्षा ८ मा अध्ययनरत मनिषा जैसीले साउन २६ गते आफ्नो जन्मदिनको अवसर पारेर आमाबाट पाएको रकमबाट विद्यालयलाई कुचो, डस्टर र साना भाईबहिनीहरूलाई शैक्षिक सामाग्री प्रदान गरेकी हुन ।
विद्यार्थी जीवनबाटै असल अभ्यास र व्यवहार परिवर्तनको सुरुवात गरी असल संस्कार तथा व्यवहार परिवर्तन सहितको शिक्षा प्रदान गर्ने अभियानमा लागेको जनचाहना आधारभूत विद्यालय डुम्रेनी ठाकुरबाबा १, बर्दियाका विद्यार्थीहरुले जन्मदिनमा केक काट्ने, चक्लेट बाँड्ने जस्ता फजुल खर्चहरु कटौती गर्दै जन्मदिनको अवसरमा विद्यालय सरसफाईका लागी आवश्यक कुचो,डस्टर,सावुन तथा विपन्न साथीभाईलाई कापी, कलम प्रदान गरेर मनाउने गरेको प्रधानाध्यापक यज्ञ नेपालले बताए ।
आफ्नो जन्मदिनको अवसरमा यस अघी पनि कक्षा ८ का विद्यार्थी कमल माझी र कक्षा २ का विद्यार्थी निर्मल थापाले विद्यालयलाई अत्यआवश्यक पर्ने सामाग्रीहरु जस्तै डस्विन, कुचो र साबुन लगाएतका सामाग्रीहरु प्रदान गरी जन्मदिन मनाएका थिए ।
यसैविच बिद्यालयमा सरसफाई तथा शैक्षिक सामग्री प्रदान गरेर उदाहरणीय रूपमा जन्मदिन मनाएकि जनचाहना आधारभूत विद्यालय डुम्रेनीकि छात्रा मनिषा जैसीलाई ठाकुरबाबा नगरपालिकामा आयोजित कार्यक्रममा सहभागी हुन आएको अवसर पारेर ठाकुरबाबा नगरपालिकाका उपप्रमुख विना भट्टराई सहितको उपस्थितिमा शैक्षिक सामग्री प्रदान गरेर जन्मदिन मनाईएको छ ।
यस्ता किसिमका कार्यले विद्यार्थीहरुमा समेत सेवा दायित्वको भावना जाग्रीत हुने हुदा यस्ता कार्यलाई प्रोत्साहन गर्नु पर्ने समेत प्रधानाध्यापक नेपालले भने ।
