बर्दियाको ठाकुरबाबा नगरपालिका–४ सैनावारमा जीविकोपार्जन समूहका सदस्यहरूका लागि मौषमी तथा बेमौषमी खेतीसम्बन्धी दुई दिने तालिम आइतबारदेखि सुरु भएको छ ।

जेट एस एल नेपालको सहयोगमा उज्यालो नेपालद्वारा सञ्चालित Championing ChangeM Living in Harmony with Wildlife in Low Land Nepal परियोजनाअन्तर्गत तालिम सञ्चालन भएको उज्यालो नेपालका अध्यक्ष नवराज न्यौपानेले जानकारी दिए ।

यस परियोजना अन्तर्गत बर्दिया राष्ट्रिय निकुञ्जको मध्यवर्ती क्षेत्रका २१ वटा जीविकोपार्जन समूहलाई समेटेर तालिम दिइँदै आएको छ । समूहको कोषमा ६ देखि ८ लाख रुपैयाँसम्म उपलब्ध गराइएको र सदस्यलाई वार्षिक अधिकतम ६ प्रतिशत ब्याजदरमा ऋण सुविधा दिने व्यवस्था गरिएको अध्यक्ष न्यौपानेले भने ।

तालिममा मौषमी तथा बेमौषमी तरकारी–बाली उत्पादनका प्रविधि, बीउ व्यवस्थापन, रोग–कीरा नियन्त्रण, बजार व्यवस्थापन, जलवायु परिवर्तनसँग सम्बन्धित कृषि अभ्यास, खेतीको तालिका तथा सिंचाइ प्रविधिबारे सैद्धान्तिक र व्यावहारिक ज्ञान सिकाईने न्यौपानेले बताए ।

उद्घाटन कार्यक्रममा वडा अध्यक्ष अमिन थारु, उज्यालो नेपालका अध्यक्ष नवराज न्यौपाने र बर्दिया राष्ट्रिय निकुञ्जका पूर्व वार्डेन रमेश थापाले यस्ता तालिमले कृषकलाई आत्मनिर्भर बनाउन र कृषिजन्य आम्दानी बढाउन सहयोग गर्ने धारणा राखे ।

यसअघि यस्तै तालिम सुर्खेतको भेरीगंगा नगरपालिका–५ हात्तीखाल र गेरुवा गाउँपालिका, र बारबर्दिया नगरपालिका–९ ढकैला र खैरेनीमा सम्पन्न भइसकेको र अन्य स्थानमा क्रमशः तालिम सञ्चालन गरिने उज्यालो नेपालले जनाएको छ ।