मलखाद्य अभावको समस्याले ग्रस्त बर्दियाका कृषकहरूले आइतबार जिल्ला प्रशासन कार्यालय बर्दियामा घेराउ गर्दै तीव्र प्रदर्शन गरेका छन् ।
मौसमी खेतीको महत्वपूर्ण समयमै आवश्यक मल नपाएर बाली उत्पादनमा ठूलो संकट आउने अवस्था देखिएपछि कृषकहरूले सरकार र सम्बन्धित निकायको मौनताप्रति आक्रोश व्यक्त गरेका हुन् । प्रदर्शनमा सहभागी कृषकहरूले “मल दे, खेती बचाऊ”, “कृषिमन्त्री राजीनामा दे” जस्ता नारासहित र्याली निकालेर प्रशासन कार्यालय परिसर घेराउ गरेका थिए ।
आन्दोलनकारीहरूले तत्काल मल आपूर्ति र दीर्घकालीन समाधानको माग गर्दै जिल्ला प्रशासन कार्यालयमार्फत ज्ञापनपत्र समेत बुझाएका छन् । ज्ञापनपत्रमा मल अभाव समाधानका लागि ठोस योजना बनाउन तथा किसानलाई समयमै सहज रूपमा मल उपलब्ध गराउन आग्रह गरिएको छ ।
कृषकहरूले चेतावनी दिएका छन् कि माग पूरा नभए अझ कडा आन्दोलनका कार्यक्रम घोषणा गरिनेछ । उनीहरूले स्थानीय तहदेखि संघीय सरकारसम्मको उदासीनताका कारण कृषकहरूको जीविकोपार्जन संकटमा परेको गुनासो गरेका छन् ।
