ठूलो र गम्भीर रोगको उपचारका लागि बर्दियाका नागरिकहरुले जिल्लाभित्र नै गुणस्तरीय स्वास्थ्य सेवा पाउने वातावरण अझै बन्न सकेको छैन । नेपाल सरकारले हरेक पालिकामा एउटा अस्पताल बनाउने नीति लिएको छ । ती अस्पतालहरुको पूर्वाधार विकास, जनशक्ति व्यवस्थापन र आवश्यक औषधि तथा उपकरणको व्यवस्थापन लगायतका विषयमा राज्यले प्रशस्त लगानी गर्नु पर्ने हुन्छ । तर त्यतातिर राज्यले स्रोत जुटाउन सकिरहेको छैन । बर्दियामा राज्यले लगानी गरेर आधारभूत रूपमा पूर्वाधार विकास भएको, जनशक्तिको दरबन्दी समेत सुनिश्चितता भएको बर्दिया जिल्ला अस्पताल रहेको छ । जिल्लाको सरदारमुकाम गुलरियामा रहेको यो यो अस्पताल जिल्लाभरिका नागरिकहरुका लागि पायक पर्ने ठाउँमा रहेको छ । पूर्वाधार निर्माणका लागि यथेष्ट जमिन पनि यससँग उपलब्ध छ । लुम्बिनी प्रदेश भरिको उत्कृष्ट अस्पतालका रूपमा यसले आफ्नो नाम पनि स्थापित गरेको छ । चुस्त व्यवस्थापनका लागि प्रतिनिधि मुलुक अस्पताल विकास समितिले काम गरिएको छ । एक प्रकारले बर्दिया जिल्ला अस्पताल बर्दियाका नागरिकका लागि भरपर्दो स्वास्थ्य सेवा प्रवाह गराउने संस्थाको रूपमा स्थापित छ । यस अस्पतालमा स्वास्थ्य गुणस्तर बढाउन लगानी गर्न सकेको खण्डमा बर्दियाका नागरिकका लागि महत्त्वपूर्ण काम हुनेछ । बर्दियामा पालिकाहरु, प्रदेश तथा सङ्घमा प्रतिनिधित्व गर्ने जनप्रतिनिधि, अन्य सरोकारवाला सरकारी तथा गैरसरकारी निकायले बर्दियामा गुणस्तरीय स्वास्थ्य सेवामा जनताको पहुँच अभिवृद्धि गर्न बर्दिया जिल्ला अस्पतालको स्तरोन्नति गर्नतिर गृहकार्य गर्न थाल्नु पर्छ । चमत्कार युक्त भाषण, गुलिया र सस्ता नाराभन्दा देखिने ठोस काम गर्न सकेमा जनता लाभान्वित हुन सक्छन् । स्वास्थ सेवा जनताको पहिलो र महत्त्वपूर्ण आवश्यकता हो । बर्दियामा सर्वसुलभ र गुणस्तरीय स्वास्थ सेवा उपलब्ध गराउन सबै पक्षबाट बर्दिया अस्पताललाई स्रोत, साधन र जनशक्तिले बलियो बनाउन आवश्यक लगानी बढाउन पहल थालौ ।