अपाङ्गता भएका व्यक्तिहरूको दैनिक जीवनयापन सहज बनाउने उद्देश्यले बर्दिया जिल्लाका २९ जना महिला तथा पुरुषहरुलाई विभिन्न सहायक सामग्री निशुल्क वितरण गरिएको छ ।
शनिवार बढैयाताल गाउँपालिका वडा नं.८ पशुपतिवजारमा सामग्री वितरण कार्यक्रमको प्रमुख अतिथी रहेका लुम्बिनी प्रदेश सरकारका सामाजिक विकास मन्त्री जन्मजय तिमिल्सिनाले सहायक सामग्री वितरण गर्दै यो सहयोगले अपाङ्गता भएका व्यक्तिहरूको जीवनयापनमा सहजता ल्याउने विश्वास व्यक्त गरे । उनले जनगणना २०७८ को तथ्याङ्क उल्लेख गर्दै “बर्दियामा १४ हजार ८ सय १७ जना अपाङ्गता भएका व्यक्ति रहेको र तीमध्ये ६० प्रतिशत शारीरिक अपाङ्गता भएका छन् र उनीहरू अझै पनि आवश्यक सहायक सामग्रीको अभावमा कठिन जीवन बिताउन बाध्य छन् ।” ति सबैमा सहायता सामग्री पु¥याउन सकियो भने अपाङ्गता भएको मानिसलाई सहयोग पुग्ने बताए ।
सामाजिक बिकास डिभिजन कार्यालय, नेपालगञ्ज बाँकेको आर्थिक सहयोगमा अपाङ्ग सशक्तिकरण तथा सञ्चार केन्द्र (डेक नेपाल) को आयो– जनामा र बर्दिया अपाङ्ग पुनःस्थापना केन्द्रको समन्वयमा सम्पन्न भएको हो । डेक नेपालका अनुसार वितरण गरिएका सामग्रीबाट गेरुवा, राजापुर, मधुवन, गुलरिया र बढैयाताल क्षेत्रका १६ जना शारीरिक अपाङ्गता भएका र १३ जना दृष्टिविहीन अपाङ्गता भएका व्यक्तिहरू लाभान्वित भएका छन् ।
सहायता सामग्रीमा ल्यापटप ३ जनालाई (शैक्षिक सहायताको लागि), ह्वीलचेयर ४ जनालाई, ट्राइसाइकल ५ जनालाई, सेतो छडी १० जनालाई, वाकर ४ जनालाई, बैसाखी २ जनालाई र ट्वाइलेट चेयर १ जनालाई वितरण गरिएको छ ।
कार्यक्रमका विशिष्ट अतिथि सामाजिक डिभिजन कार्यालय, बाँकेका प्रमुख उद्धव श्रेष्ठले वितरण गरिएका सामग्री अपाङ्गता भएका व्यक्तिहरूका लागि अत्यन्तै आवश्यक रहेको भन्दै सामग्रीहरूको उचित प्रयोग गर्न आग्रह गरे ।
डेक नेपालका प्रतिनिधि टेकराज जैसीले कार्यक्रमको पृष्ठभूमि र उद्देश्यबारे प्रकाश पारेका थिए भने, कार्यक्रममा बढैयाताल गाउँपालिका वडा नं. ९ का अध्यक्ष वीरबहादुर थारू, वडा नं. ७ का अध्यक्ष राधेश्याम थारू, वडा नं. ८ का वडा सदस्यहरू, जनप्रतिनिधि, अपाङ्गता भएका व्यक्तिहरूका अभिभावक, सञ्चारकर्मी लगायत स्थानियहरुको सक्रिय सहभागिता रहेको थियो ।
