राष्ट्रिय परीक्षा बोर्डले यस बर्षको एसईई परीक्षाको नतिजा प्रकाशन गरे पश्चात् नतिजालाई लिएर शिक्षक, अभिभावक, विद्यार्थी तथा सरोकारवालाहरु विभिन्न प्रकारका प्रतिक्रियाहरु व्यक्त हुन थालेका छन् । नेपालको संविधान २०७२ ले विद्यालय स्तरीय शिक्षाको अधिकार स्थानीय तह लाई दिएको छ । अहिले प्रकाशित नतिजाको सफलता र कमजोरीलाई लिएर स्थानीय तहको नेतृत्वको कार्यकुशलताका बारेमा समेत चर्चा हुन थालेको छ । गत बर्षको तुलनामा यस पटक एसईईमा धेरै विद्यार्थी उत्तीर्ण भएका छन् । यसपटक ६१ प्रतिशतभन्दा बढी विद्यार्थीले ग्रेडिङ सूचीमा आफू लाई सुनिश्चित गरेका छन् । यो सफलता गत बर्षको तुलनामा १४ प्रतिशतले बढी हो । गत बर्ष एसईईमा प्रकाशित नतिजामा विद्यार्थीको कमजोर ग्रेडिङ हुँदा शिक्षा क्षेत्रमा निराशा छाएको थियो । यस बर्ष देखिएको सफलताले सरोकारवालामा आशाको सञ्चार भएको छ । सार्वजनिक विद्यालय ले देखाएको प्रगति पनि यस बर्ष संतोषजनक छ । ननग्रेडिङमा रहेका विद्यार्थीहरुलाई गेडिङ सूचीमा स्तरोन्नति गर्ने चुनौती भने अझै टड्कारो छ । जे होस् यस बर्षको सफलता आशा लाग्दो छ, आगामी बर्षमा यसलाई अझ बढाउदै एसईईलाई फलामे ढोका ठान्ने पुरानो सोचलाई बदल्न आवश्यक छ । यस पछि विद्यार्थीले रोज्ने विषयका लागि समेत सरोकारवाला सबैले सचेत हुनु आवश्यक छ।यसका लागि नियमित, क्रमबद्ध र सामुहिक प्रयत्न अनिवार्य छ ।