गुलरिया नगरपालिकामा सञ्चालित शिक्षा कचहरी कार्यक्रममा विद्यार्थीहरूले विद्यालयमा गुणस्तरीय शिक्षासँगै खानेपानी, सरसफाई, महिनावारी स्वच्छता तथा अपांगमैत्री पूर्वाधारको माग गरेका छन् ।
नेपाल प्रजनन स्याहार केन्द्र राष्ट्रिय अपांग महासंघ नेपालको प्राविधिक तथा वाटर एड नेपाल को आर्थिक सहयोगमा, बेस संस्था मार्फत सञ्चालित वास गेन्स परियोजनाअन्तर्गत कार्यक्रम आयोजना गरिएको हो ।
कचहरीमा सहभागी विद्यार्थी हरूले विद्यालयमा जिर्ण शौचालय, खेल मैदानको अभाव, बर्खायाममा मैदानमा पानी जम्ने समस्या, अपांग विद्यार्थीको पहुँच नहुँदा भोग्नु परेका कठिनाइ लगायतका विषय मा धारणा राख्दै तत्काल समाधानको माग गरे ।
कार्यक्रममा गुलरिया नगर उपप्रमुख सावित्रा गौतम, शिक्षा शाखा प्रमुख सतिस यादव, विभिन्न विद्यालयका प्रधानाध्यापक तथा व्यवस्थापन समितिका प्रति– निधिहरूको सहभागिता रहेको थियो ।
विद्यार्थीका जिज्ञासाहरूको जवाफ सम्बन्धित अधिकारीहरूले कार्यक्रममा नै दिएका थिए । परियोजना संयोजक जगदीश चौधरीले आगामी योजनाहरूको जानकारी दिँदै अपांग विद्यार्थीका लागि विशेष पहल गरिने प्रतिबद्धता जनाए । कार्यक्रममा वास गेन्स परियोजना सञ्चालन भएका र नभएका विद्यालयहरूको अवस्था, चुनौती तथा सुधार सम्भावना समेटिएको भिडियो पनि प्रस्तुत गरिएको थियो ।
