बर्दियाको ठाकुरबाबा नगरपालिकाले नागरिकको घरमै पुगेर सामाजिक सुरक्षा भत्ता नवीकरण गरेको छ । पालिकाले सामाजिक सुरक्षा भत्ता लाभग्राहीहरु वडा कार्यालयमा पुग्न समस्या हुने अशक्त, अपाङ्ग र वृद्धवृद्धालाई लक्षित गरी घरमै पुगेर सामाजिक सुरक्षा भत्ता नवीकरण गर्ने गरिएको ठाकुरबाबा नगरपालिकाका नगरप्रमुख तिलकराम लम्सालले बताए ।
भदौ मसान्त सम्म सामाजिक सुरक्षाभत्ता लाभग्राहीहरुले आफ्नो विवरण सहित सामाजिक सुरक्षा भत्ता नवीकरण गरिसक्नुपर्ने भन्दैे, पहिलो चरणमा सामाजिक सुरक्षा भत्ता लाभग्राहीहरुको सहजताका लागि वडामा बाहेक पायक पर्ने टोलका विभिन्न स्थानहरु सामाजिक सुरक्षा भत्ता नवीकरणको लागि वडाबाट प्रतिनिधि खटिएको समेत नगरप्रमुख लम्सालले जानकारी दिए ।
ठाकुरबाबा नगरपालिकाको टोल–टोलमा नवीकरणका लागि पुगेको टोली सम्म उपस्थित हुन नसक्ने जेष्ठ नागरिक, अशक्त र असाहयहरुको लागि घरमै पुगेरनवीकरणको लागि सहजिकरण गरिएको समेत उनले भने । सामाजिक सुरक्षा भत्ता नवीकरणमा कोहि पनि छुट्न नहुने भन्दै नागरिकलाई सहज रुपमा सेवा उपलब्ध गराउनका लागि धेरै कदमहरु चाल्दै आएको लम्सालले बताए । पालिक र वडा कार्यालयले टोल र घरमै आएर सामाजिक सुरक्षाभत्ताका लागि सहजीकरण गरिदिए पछि स्थानीय लाई निकै सहज भएको ठाकुर–बाबा नगरपालिका बडा नं २ रानीपुरका कुमार खड्काले बताए ।
ठाकुरबाबा नगरपालिकाको ९ वटै बडाका ४४ सय १२ जना सामाजिक सुरक्षा भत्ता नविकरण गर्नु पर्नेमा रहेको छ । जस मध्य ठाकुरबाबा नगरपालिका बडा नं १ मा ४ सय ९० जना, बडा नं दुई मा ६ सय ९३ जना, बडा नं तीनमा ६ सय ४६ जना, बडा नं चारमा ५ सय ७ जना, बडा नं पाँचमा ४ सय ७२ जना, बडा नं छ मा ४ सय ३६ जना, बडा नं सातमा ३ सय २७ जना, बडा नं आठमा ३ सय ८४ जना र बडा नं नौ मा ४ सय ५७ जना रहेको मध्य साउन १५ गते सम्म २ हजार ४४ जनाको करिब ४६.३३ प्रतिशत सामाजिक सुरक्षा भत्ता नविकरण गरिसकिएको ठाकुरबाबा नगरपालिकाको कार्यालयका पुष्कर न्यौपानेले जानकारी दिए ।
