थारू महिला उत्थान केन्द्रको आयोजनामा बर्दियाको गुलरिया नगरपालिका–४बगहीान वृक्षारोपण तथा वन व्यवस्थापन सम्बन्धी अभिमुखिकरण कार्यक्रम सम्पन्न भएको छ। “नवकरणीय ऊर्जा र दिगो कृषि अभ्यास” परियोजना अन्तर्गत सञ्चालित उक्त कार्यक्रम फिमी इन्टरनेसनलको आर्थिक सहयोगमा सञ्चालन गरिएको हो ।
कार्यक्रममा प्रगति सामुदायिक सुरक्षा समूह र उन्नति सामुदायिक सुरक्षा समूहका करिब ५० जना सहभागी थिए । अभिमुखिकरणका प्रशिक्षकका रूपमा गुत्तेश्वर सामुदायिक वन उपभोक्ता समितिका अध्यक्ष चल्टु राम थारू र सहजीकरणमा मोनीका थारूले सहजीकरण गरेकी थिइन् । करीब २५० जनालाई अभिमुखिकरण दिने लक्ष्य अनुरूप आज २ समूहका ५० जना सहभागीलाई जानकारी गराइएको छ ।
अभिमुखिकरणमा जलवायु परिवर्तनका असर, वन संरक्षण, वृक्षारोपणको महत्व, कृषिमा देखिएको समस्या र समाधानका उपाय, जैविक मल तथा किटनाशकको प्रयोगबारे सहभागीलाई जानकारी दिइएको थियो ।
सहजकर्ता मोनीका थारूले भनिन्, “जलवायु परिवर्तनले अहिलेका प्रमुख समस्याहरू जस्तै अनियमित वर्षा, बाढी, खडेरी र कृषिमा आएको उत्पादन गिरावटका कारण स्थानीय जनजीवन प्रत्यक्ष प्रभावित भएको छ । यस्ता समस्याको दीर्घकालीन समाधान भनेकै सामुदायिक वन व्यवस्थापन र वृक्षारोपण हो ।” उनले थपिन्, “हामीले जैविक मल तथा सस्तो जैविक किटनाशकको प्रयोगलाई बढावा दिनुपर्छ, जसले कृषिमा टिकाउपन ल्याउँछ र स्वास्थ्यमा पनि असर पर्दैन ।”
थारुले भनीन वृक्षारोपणबाट जीवनको दिगोपन र दृष्टिकोणको बारेमा पनि जानकारी गराउनु थियो । सहभागीहरूबाट हामीले सकारात्मक प्रतिक्रिया पाएका छौं कि उनीहरूले रूखहरू काटिरहेका छन् तर उनीहरू वृक्षारोपण र यसको फाइदाको भागको बारेमा अनभिज्ञ थिए । अब उनीहरू वृक्षारोपण र दिगो अभ्यासहरूको बारेमा बढी सचेत हुनेछन् ।
कार्यक्रममा सहभागी महिला हरूले समेत आफ्नो अनुभव सुनाएका थिए । गुलरिया नगरपालिका–४ बगहीकी माया थारूले भनिन्, “यस्ता अभिमुखिकरण तालिमले हामीलाई सकारात्मक सन्देश दिएको छ । रुखविरुवाको महत्व बुझेका छौं । जंगल विना–शले निम्त्याएको समस्याबारे जानकारी पाएका छौं ।”
त्यस्तै प्रगति सामुदायिक सुरक्षा समूहकी जित कुमारी चौधरीले भनिन्, “हामीले वृक्षारोपणबाट हुने फाइदा, विषादीको प्रयोगले स्वास्थ्यमा पार्ने असर, जैविक मल र जैविक किटनाशकका लाभबारे विस्तृत जानकारी पाएका छौं । अबदेखि हामीले सिकेको व्यवहारमा उतार्नेछौं ।”
प्रशिक्षक चल्टु राम थारूका अनुसार वृक्षारोपण र वन व्यवस्थापनको ज्ञान स्थानीय समुदायमा पु¥याउनु आजको आवश्यकता हो । जलवायु संकटसँग जुझ्न वृक्षारोपण, सामूहिक वन संरक्षण र वातावरणीय सचेतना अत्यावश्यक रहेको उनले बताए ।
अभिमुखिकरणको समापनमा सहभागीहरूले गाउँमै वृक्षारोपण गर्ने प्रतिबद्धता जनाएका थिए । थारू महिला उत्थान केन्द्रले जिल्लाका अन्य पालिकामा यसै प्रकारका कार्यक्रमहरू क्रमशः सञ्चालन गर्दै आएको छ ।
