बढैयाताल गाउँपालिकाले आर्थिक वर्ष २०८१/०८२ को वार्षिक सार्वजनिक सुनुवाई कार्यक्रम मंगलबार सम्पन्न गरेको छ ।

गाउँपालिकाको आयोजना मा तथा गोरेटो मिडिया प्रा.ली सहजीकरणमा सम्पन्न कार्यक्रममा सेवा प्रवाह, विकास निर्माणको गुणस्तर, सुशासन लगायतका विषयमा सर्वसाधारण सँग प्रत्यक्ष संवाद गरिएको थियो ।कार्यक्रममा गाउँपालिकाका ९ वटै वडाबाट लिइएको सेवा प्रवाहको विषयमा उठेका जनगुनासो तथा समस्याहरूलाई प्रालीका प्रतिनिधी दिपककुमार शर्माले अभिमतको रूपमा प्रस्तुत गरेका थिए । स्वास्थ्य, शिक्षा, पूर्वाधार विकास, फोहर व्यवस्थापन, रोजगार सिर्जना, सामाजिक सुरक्षा, महिला, बालबालिका तथा युवा मैत्री कार्यक्रमसम्बन्धी गुनासो तथा सुझावहरू सेवाग्राहीहरूले राखेका थिए ।

उक्त सार्वजनिक सुनुवाईमा वडा अध्यक्षहरू, विषयगत शाखा प्रमुखहरू, गाउँपालिका अध्यक्ष हिमालय त्रिपाठी, उपाध्यक्षसहितका पदाधिकारी हरूले जवाफ दिएका थिए । गाउँपालिका प्रमुख त्रिपाठीले उठेका सुझावहरूलाई कार्यान्व–यनको प्राथमिकतामा राखेर आवश्यक सुधार गरिने प्रतिबद्धता जनाए ।
कार्यक्रममा प्रमुख प्रशासनिक अधिकृत नारायणराज त्रिपाठीले आर्थिक वर्ष २०८१÷८२ को वित्तीय प्रतिवेदन प्रस्तुत गरेका थिए । प्रस्तुत विवरणअनुसार चालुतर्फको कुल बजेट ४७ करोड ६५ लाख १४ हजार २ सय मध्ये ३७ करोड ९६ लाख ३ हजार ६ सय ८ रुपैयाँ खर्च भई वित्तीय प्रगति ७९.६६ प्रतिशत रहेको छ । पुँजीगततर्फ ४९ करोड ६२ लाख ९८ हजार ७ सय ८८ रुपैयाँ मध्ये २१ करोड ८७ लाख २० हजार ६ सय १४ रुपैयाँ खर्च भई प्रगति ५२.५४ प्रतिशत पुगेको छ । समग्रमा गाउँपा–लिकाको वित्तीय प्रगति ६७.०१ प्रतिशत रहेको प्रतिवेदनमा उल्लेख छ ।

कार्यक्रम अगाडी आर्थिक वर्ष २०८१/८२ मा उत्कृष्ट काम गरेका पाँच निर्माण व्यवसायी लाई कदरपत्र प्रदान गर्दै सम्मान गरिएको थियो ।