चितुवा आतङ्क बढे सँगै गुलरिया नगरपालिका–५ बालापुरका स्था–नीयले परम्परागत विश्वास अनुसार जेठ १७ गते शनिबार सामूहिक रूपमा बनदेवीलाई बलि चढाई पूजा गरेका छन् ।

गुलरिया ५ बालापुर गाँउका स्थानीय अगुवा कालीप्रसाद थारूले भने, ‘चार दिनदेखि खोजी कार्य जारी छ, तर चितुवा समातिएको छैन । हामी बनदेवीको कृपाले गाउँ सुरक्षित हुने विश्वासका साथ पुजा गरेका हौँ।’ उनले भने । गएको जेठ १४ गते बिहान करिव ९ बजे नजिकैको सामुदायिक वनबाट आएको चितुवाले ७ वर्षीया बालिका साइरा थारू माथि आक्रमण गरी ज्यान लिएपछि गाउँमा त्रास र आक्रोश फैलिएको हो । यस घटना पछि घटना भएकै दिन बुधबार दिनभरि जसो स्थानीय वासीले जिल्ला प्रशासन कार्यालय बर्दिया पुगेर चितुवा नियन्त्रणको माग गर्दै प्रशासनमा धर्ना समेत दिएका थिए ।

चितुवाको आक्रमणपछि प्रशासनले जनशक्ति र उपकरण सहित नियन्त्रणको प्रयास थालेको भए पनि समाचार तयार पार्दासम्म चितुवा नियन्त्रणमा आउन सकेको छैन ।

स्थानीय मूल बरघर थारूका अनुसार, ‘तीन महिनाको अवधिमा चितुवाको आक्रमणबाट चार वटा घटना भइसकेका छन्, जसमा दुई जनाको ज्यान गइसकेको छ । अरू केही व्यक्ति घाइते भएका छन् ।’ उनले बताए ।

चितुवाको आक्रमणबाट साइराको निधन पछि बालापुर गाउँमा गहिरो डर र सन्नाटा छाएको छ । बालबालिकालाई घर बाहिर जान दिइएको छैन भने मानिसहरू दैनिक कामकाजका लागि समेत निस्कन डराइरहेका छन् ।

गुलरिया ५ को बालापुरमा चितुवाको आक्रमणबाट बालिका मृत्युको खबर संगै निरन्तर डिभि–जन वन कार्यालय बर्दियाले सो क्षेत्रको २४ औं घण्टा आक्रमण गर्ने चितुवाको खोजिका लागि लागिपरेको डिभिजन वन कार्यालय बर्दियाले बताएको छ ।

“घटना लगत्तै चितुवाको खोजीका लागि बर्दिया राष्ट्रिय निकुञ्जबाट दुईवटा हात्ती र प्राविधिक टोली परिचालन गरिएको तर हालसम्म चितुवा फेला नपरेको डिभिजन वन कार्यालय बर्दियाका सुचना अधिकारी बरिष्ठ वन अधिकृत रामकुमार चौधरीले जानकारी दिए । चितुवा नियन्त्रणका लागि डिभिजन वन कार्यालय बर्दियाको ३० जनाको टोलि, राष्ट्रिय प्रकृति संरक्षक कोष NTNC को २ जना डाक्टरहरु सहित करिव १ दर्जन जना सुरक्षाकर्मीहरुको टोलिले दिन रात चितुवाको खोजिका लागि लागिपर्दा पनि चितुवा नभेटिएको समेत बरिष्ठ वन अधिकृत चौधरीले बताए । चितुवाको स्थान पत्ता लगाउनका लागि विभिन्न ९ वटा स्थानमा क्यामरा जडान समेत गरिएको र चितुवालाई पक्रनका लागि ५ वटा स्थानमा केज समेत राखि २४ घण्टा निगरानी गर्दा समेत चितुवाको अवस्था पत्ता नलागेको चौधरीले भने । वनमा एकदमै झाडिहरुको बाक्लो अवस्थामा भएकोले पनि चितुवालाई खोज्न असहज रहेको समेत उनले भने ।

खोजी गरिरहेको भएपनि चितुवा नियन्त्रणमा आउन नसक्दा स्थानीय हरु त्रसिद रहेका छन । चाँडै चितुवा नियन्त्रणमा लिन प्रशासन सँग स्थानीहरु जोडदार माग गरिरहेका छन् ।