गुलरियाको थारू महिला उत्थान केन्द्रमा सातौं राष्ट्रिय महिला अधिकार दिवसको अवसरमा “लैङ्गिक समन्यायिक आत्मनिर्भर समाजको श्रृजना, महिला अधिकारको सम्मानः आत्मनिर्भरता हाम्रो अभियान” भन्ने नारासहित १ दिने अभिमुखिकरण कार्यक्रम सम्पन्न गरिएको छ।
कार्यक्रमको आयोजना थारू महिला उत्थान केन्द्रले गरेको हो भने नागरिक आवाजले सहयोग गरेको थियो। कार्यक्रमको अध्यक्षता राजकुमारी थारूले गर्नुभएको थियो। अध्यक्ष थारुले अभिमुखीकरण कार्यक्रममार्फत आदिवासी जनजाति महिलाहरूलाई राष्ट्रिय तथा अन्तर्राष्ट्रिय कानुनले दिएको राजनितिक , सास्कृतिक तथा आर्थिक आधिकारमा आम महिलाहरुको पहुंच बढाउन जानकारी प्रदान गरिएको बताइन ।
कार्यक्रममा थारू महिला उत्थान केन्द्रका कार्यकारी निर्देशक प्रिज्मा सिंह थारूले विगत लामो समयदेखि संस्थाले आदिवासी जनजाति तथा महिलाहरूको हक–अधिकारका लागि काम गर्दै आएको जानकारी दिइन । कार्यक्रममा आफ्नो धारणा राख्दै उनले आगामी दिनमा पनि यस्ता जनचेतनामूलक कार्यक्रमहरूलाई निरन्तरता दिइने प्रतिबद्धता व्यक्त गरिन ।
कार्यक्रमका प्रमुख प्रशिक्षक अधिवक्ता काशीराम थारूले “आदिवासी महिलाको अधिकार र कानुनी उपचार” विषयमा प्रशिक्षण दिएका थिए । प्रशिक्षणमा ४० जना सहभागीहरूको उपस्थिति रहेको थियो। सहभागीहरूले आफूले पहिला नजानेका अधिकारहरूबारे जानकारी पाएको अनुभव सुनाएका थिए।
मधुवन नगरपालिका–१ की रेखा थारूले कार्यक्रमबाट कानुन र अधिकारबारे धेरै कुरा सिक्न पाएको बताइन्। “पहिला कानुन भनेको के हो भन्ने बुझ्दिनथेँ, अब चाहिँ थोरै भए पनि बुझ्न थालेँ,” उनले भनिन्।
त्यस्तै, बार्दिया नगरपालिका–३ बेलुवा बज्जाकी सुस्मा कुमारी थारूले यस्तो कार्यक्रम पहिलोपटक सहभागी भएको बताउँदै आफूलाई धेरै कुरा सिक्ने अवसर प्राप्त भएको बताइन्। “महिलाको अधिकार धेरै रै’छ, थाहा पाउँदा आश्चर्य लाग्यो,” उनले भनिन्।
यस अभिमुखिकरण कार्यक्रमले स्थानीय तहमा महिला तथा आदिवासी समुदायका प्रतिनिधिहरूमा अधिकार, कानुनी पहुँच र आत्मनिर्भरताबारे जागरुकता फैलाउन महत्वपूर्ण योगदान दिएको सहभागीहरूको भनाइ थियो।
