गुलरिया / कानुनी राज्यको अनुभूति दिलाउँदै जिल्ला प्रहरी कार्यालय बर्दियाले फरार रहेका दुई कैदीलाई पक्राउ गरी जिल्ला अदालत बर्दियामा बुझाएको छ ।
प्रहरीका अनुसार २० दिन कैद सजाय भएका केश बहादुर शाही र १० दिन कैद सजाय भएका भुपेन्द्र क्षेत्री लुकिछिपी बसिरहेको अवस्थामा पक्राउ परेका हुन् ।
बर्दिया जिल्ला अदालतले २०८१ साल मंसिरमा शाहीलाई २० दिन कैद तथा ३ हजार रुपैयाँ जरिवाना र २०८१ साल वैशाखमा क्षेत्रीलाई १० दिन कैद तथा २ हजार रुपैयाँ जरिवाना गर्ने फैसला गरेको थियो ।
जिल्ला प्रहरी कार्यालय गुलरियाबाट खटिएको टोलीले गुलरिया–६, सन्तोषी टोलबाट २७ वर्षीय केश बहादुर शाहीलाई पक्राउ गरेको हो। त्यस्तै, इलाका प्रहरी कार्यालय ढोढरीको टोलीले मधुवन–८ बाट २२ वर्षीय भुपेन्द्र क्षेत्रीलाई पक्राउ गरेको हो ।
उनीहरू दुवैजना घरमै लुकिछिपी बसिरहेको अवस्थामा प्रहरीले नियन्त्रमा लिई आवश्यक कानुनी कारबाहीका लागि जिल्ला अदालत बर्दियामा बुझाएको जानकारी जिल्ला प्रहरी कार्यालयका प्रहरी निरीक्षक कृष्ण डाँगीले एक प्रेस विज्ञप्तिमार्फत दिएका छन् ।
