नेपाली कांग्रेसका बरिष्ठ नेता डा.शेखर कोइरालाले स्वतन्त्र सेनानी स्व.भेषराज पौडेल को निधन प्रति गहिरो दुःख व्यक्त गर्दै स्व.पौडेल प्रति श्रद्धाञ्जलि व्यक्त गरेका छन ।
अग्रज पत्रकार एवं प्रेस स्वतन्त्रता सेनानी भेषराज पौडेलको ७५ बर्षको उमेरमा यहि बैशाख २९ गते असामयिक निधन भएको थियो।
निधन भएको आज जेठ ४ गते ७ औं दिन समवेदना व्यक्त गर्दै कोइरालाले बर्दिया जिल्ला सहित पश्चिम नेपालमा पत्रकारिता, साहित्य र शिक्षा क्षेत्रमा मार्फत नेपालको लोकतान्त्रिक आन्दोलनमा भेषराज जी ले पुर्याउनु भएको योगदान हामी सबैका सामु अतुलनीय र अविस्मरणीय रहेको बताए।
डा.शेखर कोइरालाले असामयिक निधन प्रति परिवारजनमा समवेदना प्रकट गर्दै स्व.भेषराज पौडेल प्रति हार्दिक श्रद्धाञ्जली व्यक्त गर्नु भएको छ ।
काङ्ग्रेस बरिष्ठ नेता डा.शेखर कोइरालाको समवेदना पत्र स्व.भेषराज पौडेलका परिवारलाई नेपाली कांग्रेस लुम्बिनी प्रदेश सदस्य पुष्पलाल श्रेष्ठ र नेपाली कांग्रेसका नेता विद्याप्रसाद खनालले हस्तान्तरन गरेका थिए।
समवेदना पत्र हस्तान्तरनका समयमा नेपाल पत्रकार महासंघ केन्द्रिय निवर्तमान अध्यक्ष विपुल पोखरेल, नेपाल पत्रकार महासंघ बर्दियाका पूर्व अध्यक्ष राजेन्द्रप्रसाद धिताल र नेपाल प्रेस युनियन लुम्बिनी प्रदेशका अध्यक्ष सुदिप गौतम लगायतको उपस्थिति रहेको थियो।
लोकतान्त्रिक आन्दोलनलाई सघाउन पत्रकारित गर्ने भेषराज पौडेल एक निर्भिक मिसन पत्रकार रहनुभएको थियो ।
निरङ्कुश पञ्चायती व्यवस्था चरम उत्कर्षमा रहेको कठिन घडीमा उहाले २०४२ सालमा दाङ जिल्लामा “जय नेपाल साप्ताहिक पत्रिका” चलाउनु भएको र २०४५ सालमा लोकतन्त्रको पक्षमा आफ्नो पत्रिकामा सम्पादकीय लेखे बापत स्व.भेषराज पौडेलले जेल सजाय समेत भोग्नु भएको थियो ।
स्व.भेषराज पौडेलका एक धर्म पत्नि निमा पौडेल र छोराहरु मनोज पौडेल र विराज पौडेल रहेका छन् ।
