सत्तारुढ दल नेपाली कांग्रेसले पार्टी कुनै पनि किसिमको आतंकवादको विरुद्धमा रहेको बताएको छ । शुक्रबार पार्टी सभापति शेरबहादुर देउवाको निवास बुढानीलकण्ठमा बसेको पार्टीको पदाधिकारी र पूर्वपदाधिकारीको बैठकपछि बोल्दै पार्टीका प्रवक्ता डा प्रकाशशरण महतले कांग्रेस आतंकवादको विरुद्धमा रहेको बताएका हुन् ।
उनले भारत र पाकिस्तानबीच भइरहेको द्वन्द्वप्रति पार्टीले निहत्था नागरिकमाथि भएको आक्रमणको निन्दा गरेको बताए । उनले कांग्रेसले आतंकवादको खिलापमा हुने कारबाहीलाई जायज ठान्ने बताए ।
उनले पाकिस्तान र भारतबीच चाँडै शान्ति कायम होस् भन्ने पक्षमा कांग्रेस रहेको बताए । कांग्रेस आतंकवादलाई निरुत्साहित गर्नेतर्फ रहेको बताए ।
महतले भने, ‘सँगै भारत र पाकिस्तानको बीचमा जुन द्वन्द्व चर्किएको छ त्यसअघि भारतको पहलगाममा जुन आतंकवादी आक्रमण भयो । लक्षित किसिमबाट निहत्था नागरिकमाथि आक्रमण भएर मारिए । त्यसको नेपाली कांग्रेसले कडा शब्दमा निन्दा पनि गरेका छौँ । पछिल्लो समयमा पनि यो जुन परिस्थिति छ, हामी जहिले पनि आतंकवादको खिलापमा छौँ । आतंकवादको खिलापमा हुने कारबाहीलाई हामी जायज ठान्छौँ । आतंकवादलाई कसैले पनि प्रश्रय नदिओस् भन्ने पक्षमा छौँ । युद्धको स्थिति सिर्जना भएको छ, आतंकवादी अखडामाथि आक्रमण भएपछि पाकिस्तानको तर्फबाट पनि जवाफी सिभिलिएनमाथि पनि आक्रमण भएको छ । सैनिक अड्डाहरुमा पनि आक्रमण भएको छ । यो फुलस्केल युद्धको रुपमा परिणत नहोस् । शान्ति चाँडै बहाल होस्, भन्ने हामी चाहन्छौँ । हामी आतंकवादको खिलापमा छौँ । आतंकवादलाई निरुत्साहित गर्नेतर्फ हामी छौँ ।’
उनले आतंकवादलाई कसैले पनि प्रश्रय दिन नहुने बताए ।
साभार /हाम्रो कुरा
