गुलरिया, बर्दिया — नेपाली कांग्रेसका सांसद सञ्जयकुमार गौतमले भारत र पाकिस्तानबीच विकसित पछिल्लो तनावले नेपालमा पार्नसक्ने सम्भावित प्रभावबारे सरकारलाई समयमै सचेत हुन आग्रह गरेका छन्।
बुधबार प्रतिनिधिसभाको बैठकमा बोल्दै सांसद गौतमले यस्तो अन्तर्राष्ट्रिय परिस्थितिमा नेपाल सरकारले अल्पकालीन र दीर्घकालीन असरहरूको मूल्यांकन गर्दै स्पष्ट रणनीति तयार गर्नुपर्ने बताए। “समस्या सामनामा दलबीच विभाजन होइन, एकता जरुरी हुन्छ,” उनले भने, “अहिलेको अवस्था गम्भीर छ, दलहरू एकताबद्ध भएर अगाडि बढ्नुपर्छ।”
उनले नेताहरूको पछिल्लो अभिव्यक्तिहरू राजनेताको भूमिका अनुसार नभएको महसुस भएको उल्लेख गर्दै संविधान संशोधन, संघीयताको सशक्तीकरण, संस्कृतिको संरक्षण र प्रवर्द्धनमा दलहरूबीच न्यूनतम सहमति आवश्यक रहेको बताए।
गौतमले बर्दियासहितका राष्ट्रिय निकुञ्ज क्षेत्रका बासिन्दा जङ्गली जनावरको त्रासमा रहेको उल्लेख गर्दै जनसुरक्षाको प्रत्याभूति हुने वातावरण बनाउन सरकारको ध्यानाकर्षण गराए।
