बर्दिया, फागुन १६ / बर्दियामा मोटरसाइकल दुर्घटनामा एक जनाको मृत्यु भएको बर्दिया प्रहरीले जानकारी दिएको छ । बर्दियाको भुरीगाउँ -गुलरिया सडकखण्ड अन्तर्गत ठाकुरबाबा नगरपालिका बाड नं ३ को बगनाहा बजार नजिक फागुन १५ गते बिहीबार राति मोटरसाइकल दुर्घटना हुँदा मोटरसाइकलमा सवार एक जनाको ज्यान गएको प्रहरीले बताएको छ । दुर्घटनामा मोटरसाइकल चालक गम्भीर घाइते भएका प्रहरीले जनाएको छ ।
दुर्घटना स्थल चुरे क्याम्पस गेटको कल्भर्ट नजिक भुरिगाउँ बजारबाट बनकट्टि घर तर्फ जाने क्रममा भे १२ प ११०८ नम्बरको मोटरसाइकल र भे १ स ८६३२ नम्बरको अटो ठोक्किदा ठाकुरबाबा नगरपालिका ५ का मोटरसाइकलमा सवार ५८ वर्षिय दरवारी थारुको ज्यान गएको प्रहरीले बताएको छ । यसैगरी दुर्घटनामा ठाकुरबाबा नगरपालिका ५ का मोटरसाइकल चालक ६० वर्षिय माक्खुराम थारु घाइते भएको समेत प्रहरीले जानकारी दिएको छ ।
दुर्घटना भए लगत्तै घाइते दुवै जनालाई ठाकुरबाबा नगर अस्पताल भुरिगाउँ लगिएकोमा मोटरसाइकलमा सवार दरवारी थारुलाई चिकित्सकले मृत घोषणा गरेका प्रहरीले जनाएको छ । गम्भीर घाइते भएका मोटरसाइकल चालकलाई थप उपचारका लागि राति नै नेपालगञ्ज मेडिकल कलेज लगिएको र आइसियुमा उपचार भइरहेको प्रहरीले जनाएको छ ।
अटो चालक ठाकुरबाबा नगरपालिका २ तिनघरुवाका ४७ वर्षिय धनिराम थारुलाई प्रहरीले नियन्त्रणमा लिएको छ । दुर्घटना बारे अनुसन्धान भइरहेको प्रहरीले जनाएको छ ।
