काठमाडौं, पुस १० गते / सशस्त्र प्रहरीका चार जिल्लाका तराईका एसपीहरु छानबिनका लागि सशस्त्र प्रहरी प्रधान कार्यालय तानिएका छन् ।
सशस्त्र प्रहरी प्रमुख आईजीपी राजु अर्यालको आदेशमा मोरङका एसपी विश्व खड्का, बाराका एसपी सन्तोषबहादुर सिंह, धनुषाका एसपी दर्शन गिरी र बाँकेका एसपी बिमल डाँगीलाई छानबिनका लागि सशस्त्र प्रहरी मुख्यालय तानिएको हो ।
सबैभन्दा पहिला सशस्त्र प्रहरी प्रधान कार्यालयमा छानबिनमा तानिने धनुषाका एसपी गिरी हुन् भने अरु तीन जना सोमबार तानिएका हुन् । एसपी गिरी गत बिहिवार तानिएका थिए।
अवैध तस्करीमा मिलेमतो लगायत अन्य आरोप लागेपछि छानबिनका लागि चार जना जिल्ला एसपीहरुलाई मुख्यालय तानिएको सशस्त्र प्रहरी श्रोतले बतायो । अहिले उनीहरुसँग सम्बन्धित विषयमा छानबिन भइरहेको सशस्त्र प्रहरी श्रोतले जानकारी दिएको छ ।
श्रोतका अनुसार धनुषाका एसपी गिरीमाथि आर्थिक अनियमितता गरेको उजुरी छ भने अन्य तीन जनामाथि अवैध तस्करी लगायतका विषयमा उजुरी परेको हो ।
सशस्त्र प्रहरी प्रधान कार्यालय श्रोतका अनुसार छानबिनका क्रममा दोषी उनीहरु दोषी भेटिए कारबाही गरेर अर्कै एसपीहरुलाई पठाइने र निर्दोष पाइए उनीहरुलाई नै फिर्ता पठाउने बताइएको छ । यसअघि पनि एसपी खड्का असारमा मुख्यालय तानिएर फिर्ता गएका थिए ।
साभार/बागेश्वपोष्ट
