बाँके, पुस ९ गते / बन्यजन्तुबाट पीडित बाँकेको राप्तीसोनारी गाउँपालिका वडा नम्बर २ स्थित टिकुलीपुरका स्थानीयले राहत प्रक्रिया सजिलो बनाइदिन माग गरेका छन् । उनीहरुले राहत प्रक्रियामा अन्य कागजातसँगै स्थायी लेखा नम्बर माग्दा समयमा राहत पाउन नसकेकाले प्रक्रिया सहज बनाउन माग गरेका हुन् ।
समुदायका लागि सञ्चार अभियान नेपाल (सीसीएन) ले आयोजना गरेको गोलघर सम्वाद कार्यक्रम युएसएडको सहयोगमा द एसिया फाउन्डेशन मु्ख्य कार्यान्वयन संस्था रहेको युएसएड नागरिक समाज तथा सञ्चार कार्यक्रम अन्तर्गत ‘वातावरणीय न्याय र जवाफदेहिताका लागि सीमान्तकृत समुदायको सबलीकरण’ अभियानमार्फत आयोजित कार्यक्रमका सहभागीहरुले यस्तो माग गरेको आयोजक संस्था सीसीएनले जनाएको छ ।
कार्यक्रममा स्थानीय सिमा केसीले बाघले बाख्रा खाएको लामो समयसम्म पनि राहत पाउन नसकेको बताइन् । उनले प्रक्रिया लामो र झन्झटिलो भएकोमा दुःखेसो पोखिन् । कार्यक्रममा सिताराम जैसीले बँदेल र बाघले मात्र होइन, सुगाले पनि बाली खाएर नोक्सानी बेहोर्नुपरेको बताए । अर्का स्थानीय पदमी पुनले ऐलानी जग्गा भएका कारण पनि राहत पाउन नसकेकोमा दुःख व्यक्त गरिन् ।
बाँकेको राप्तीसोनारी गाउँपालिका वडा नम्बर २ स्थित वन तथा वातावरण संरक्षण समन्वय समितिका अध्यक्ष कृष्ण केसीले स्थानीयहरुका समस्या समाधानका लागि यो छलफलले सहयोग पुग्ने बताए । उनले राहत प्रक्रियाका क्रममा भोगेका समस्या समाधानका लागि पहल गरिदिन आयोजक संस्था सीसीएनसँग माग गरे ।
कार्यक्रममा बिषय विज्ञ प्रकाश उपाध्यायले मानव र वन्यजन्तु बीचको द्वन्द न्यूनीकरण, राहत प्रक्रिया र बीमा प्रक्रियाका बारेमा जानकारी गराएका थिए । कार्यक्रममा ४० जनाको सहभागिता रहेको थियो । कार्यक्रम बाँकेको राप्तीसोनारी गाउँपालिका वडा नम्बर २ टिकुलीपुरस्थित हरलाफाटा सामुदायिक वन उपभोक्ता समूहको भवनमा सम्पन्न भएको थियो ।
