बर्दिया, मंसिर १६ गते / उपनिर्वाचन अन्तर्गत बर्दियाको ठाकुरबाबा नगरपालिका ४ मा मतदान सुरु भएको छ। मंसिर १६ गते आज बिहान ७ बजे देखि साँझ ५ बजे सम्म मतदानको समय तोकिएको छ।
कुल ३५ सय १० मतदाता रहेको यश बडामा १६ सय ७१ पुरुष र १८ सय ३९ महिला मतदाता रहेका छन् । २०७९ को स्थानीय निर्वाचनको ठाकुरबाबा नगरपालिका बडा नं ४ मा बडा अध्यक्ष पदमा विजयी नेपाली कांग्रेसका सुर्य बहादुर बिष्ट बर्दिया जिल्ला समन्वय प्रमुख भए सँगै अहिले सम्म बडा अध्यक्ष पद रिक्त रहेको थियो।
मतदान गर्नका लागि २ मतदान स्थल र ५ मतदान केन्द्र रहेको छ ।
आज मतदानका दिन यातायातका सम्पूर्ण सवारीसाधन बिहान देखि मतदानको समय नसकुन्जेल बन्द गरिएको छ ।
आज भइरहेको बडा अध्यक्ष पदको उपनिर्वाचनमा विभिन्न पार्टीका ६ उम्मेदवारी दिएका छन्। नेपाली कांग्रेसका तर्फबाट अमिन थारु, नेकपा एमालेबाट विष्णुप्रसाद देवकोटा, नेकपा माओवादी केन्द्रबाट शेरबहादुर थारु, राष्ट्रिय स्वतन्त्र पार्टीबाट वासुदेव शर्मा, राप्रपाबाट रत्नबहादुर शाही र नागरिक उन्मुक्ति पार्टीबाट प्रितीलाल थारु उम्मेदवार रहेको छ ।
उपनिर्वाचनको लागि जिल्ला प्रशासन कार्यालय बर्दियाले सुरक्षा व्यवस्था कडा पारेको र आजका दिन मतदान हुने सम्पूर्ण यातायातका साधन बन्द गरेको बर्दियाका प्रमुख जिल्ला अधिकारी रुद्रादेवि शर्माले जानकारी दिनु भयो । उपनिर्वाचनको सुरक्षा व्यवस्थापनका लागि नेपाल प्रहरी, सशस्त्र प्रहरी, नेपाली सेना र राष्ट्रिय अनुसन्धान गरि ३ सय भन्दा बढि सुरक्षाकर्मि परिचालन गरिएको समेत प्रमुख जिल्ला अधिकारी शर्माले बताइन ।
