बाँके, भाद्र १७ गते / बाँकेको नरैनापुर गाउँपालिका -३ गेगल गाउँका ४ जनाको मृत्यु भएको छ । एउटै घरका ३ जना र अन्य एक जनासहित ४ जनाको मृत्यु भएको हो ।
उनीहरू मध्ये २ जना भारतबाट उपचार गरी फर्केपछि र बाँकी दुई जनाको नरैनापुरमा उपचार गर्दागर्दै मृत्यु भएको स्वास्थ्य शाखाका प्रमुख नगेन्द्र शाहले जानकारी दिए । मृतक सबैमा उच्च ज्वरो आएको थियो ।
मृत्यु हुनेमा ३६ वर्षीय उषादेवी पासवान, १ वर्षीय नन्दनी पासवान, ७२ वर्षीय शान्ति देवी र १२ वर्षीय सुखिया अलिशेष रहेका छन् । उषा र शान्तिको १४ गते र नन्दनी र सुखियाको आइतबार मृत्यु भएको पुष्टि भएको स्वास्थ्य कार्यालय बाँकेका प्रमुख अंगद बहादुर शाहीले जानकारी दिए ।
उनले भने, ‘अहिले हामी स्वास्थ्यकर्मीको टोलीसहित गाउँमै आएका छौं । झाडापखलाबाट मृत्यु भएको हो वा विषाक्त खानाबाट मृत्यु भएको हो त्योबारे अनुसन्धान गरिरहेका छौँ ।’
अन्य १५ जनाको अवस्था पनि गम्भीर रहेको बताइएको छ । उनीहरुमा अन्य रोगको संक्रमण पनि हुन सक्ने अनुमान गरिएको छ
