बर्दिया,भाद्र १७ गते / बर्दियालाई कर्णाली प्रदेश संग जोड्न भुरिगाउँ तेलपानी सडक निर्माणको काम गर्ने लुम्बिनी प्रदेशका मुख्यमन्त्री चेत नारायण आचार्यले बताएका छन् ।
नेकपा एमाले बर्दिया जिल्ला कमिटिले सदस्यहरुको लागि आयोजना गरेको प्रशिक्षण कार्यक्रममा आएका मुख्यमन्त्री आचार्यले सोमबार यस्तो बताएका हुन् ।
बर्दिया जिल्लामा समस्याको रुपमा रहेको मानव बन्यजन्तु द्वन्द्व ब्यवस्थापनका लागि आरसिसि वाल निर्माण गरिने कार्यलाई प्राथमिकतामा राखिएको भन्दै बर्दिया जिल्लाको पर्यापर्यटन प्रवर्धन काम गर्ने योजना रहेको बताए ।
त्यसैगरि लुम्बिनी प्रदेशका जनताले प्रत्यक्ष सुशासनको अनुभूति गर्ने गरी काम गर्ने योजनाका साथ अघि बढ्ने बताए।
आफू मुख्यमन्त्री नियूक्ति भएको आज ३९औं दिनसम्म नीतिगत रुपमा निर्णय गरी सुशासन र पारदर्शिताको क्षेत्रमा जनताले अनुभूति गर्ने गरी काम गरेको भनाई राखे । बर्दिया जिल्लाको विकासको सन्दर्भमा संचारकर्मीहरुसंग साक्षात्कार गर्दै मुख्यमन्त्री आचार्यले बर्दियाको समग्र विकासका लागि लुम्बिनी प्रदेश सरकारले पुंजीगत तर्फ १ अर्ब ६२ करोड रुपैया विनियोजन गरेको जानकारी दिए । प्रेस चौतारी नेपाल बर्दिया शाखाले भुरिगाउँमा आयोजना गरेको पत्रकार भेटघाट कार्यक्रममा मुख्यमन्त्री चेतनारायण आचार्यले मुख्यमन्त्री तथा मन्त्रीहरुले पालना गर्नु पर्ने आचार संहिता निर्माण गरी कार्यान्वयनमा ल्याएको समेत सुनाए ।
