पूर्वराष्ट्रपति विद्यादेवी भण्डारीले पूर्व आबद्ध दल एमालेको पार्टी सदस्यता नवीकरण गरेको चर्चाबारे संसद्मा प्रश्न उठेको छ । कांग्रेसका सांसद रामहरि खतिवडाले बुधबारको प्रतिनिधिसभा बैठकमा पूर्वराष्ट्रपति भण्डारीले एमाले पार्टीको सदस्यता नवीकरण गरेको वास्तविकता के हो भन्दै प्रश्न उठाए ।
उनले पार्टी सदस्यता नवीकरण गरेको भए पूर्वराष्ट्रपति भण्डारीलाई राज्यले सेवा–सुविधा दिन नहुने भन्दै ध्यानाकर्षण पनि गराए । ‘पूर्वराष्ट्रपतिले एउटा पार्टीको सदस्यता नवीकरण गरेको कुरा आयो । सदस्यता नवीकरण गरेको हो भने पूर्वराष्ट्रपतिको हैसियतमा सुविधा लिन मिल्छ कि मिल्दैन ?’ सांसद खतिवडाले ध्यानाकर्षण गराउँदै प्रश्न गरे, ‘राज्यले त्यसबारे के सोचेको छ ? सरकारले त्यसको जवाफ देओस् ।’
एमालेले भने पूर्वराष्ट्रपति भण्डारीले सदस्यता नवीकरण गरेको पुष्टि गरेको छैन । भण्डारीले सदस्यता नवीकरण गरे–नगरेबारे एमालेले औपचारिक रूपमा बोलेको छैन । स्थायी समिति सदस्य तथा संगठन विभाग प्रमुख काशीनाथ अधिकारीले पूर्वराष्ट्रपति भण्डारीले सदस्यता नवीकरण गरेको भन्ने विषयमा आफूलाई अहिलेसम्म कुनै जानकारी नभएको बताए ।
‘अहिलेसम्म नवीकरण गरेको विषयमा मलाई जानकारी छैन, केन्द्रीय कार्यालयले आफ्नै हिसाबले सदस्यता नवीकरण गरिरहेको हुन्छ,’ अधिकारीले भने, ‘सभामुख हुने वेला देवराज घिमिरेले पार्टी सदस्यता त्यागेको जानकारी गराएर अलग हुनुभएको हो । उहाँ (पूर्वराष्ट्रपति विद्या भण्डारी)ले पनि त्यही गर्नुभएको थियो, यसभन्दा बढी भनिराख्नुपरेन, त्यसैले यो गरिराख्नुपर्ने प्रश्न पनि होइन ।’
शीतलनिवासमै हुँदा राजनीतिक भेटघाट गर्दै आएकी पूर्वराष्ट्रपति भण्डारीले अवकाश भएपछि त्यसलाई बढाएकी छिन् । गत १६ जेठमा पार्टीसम्बद्ध जनसंगठनका महिलाको राष्ट्रिय भेलामा भण्डारी प्रमुख अतिथिका रूपमा सहभागी भएकी थिइन् । त्यसयता उनी एमालेको राजनीतिमा पुनः सक्रिय हुन लागेको चर्चा छ ।
नयाँपत्रिका/साभार
