काठमाडौँ । नेपाली कांग्रेसका महामन्त्री एवं सांसद विश्वप्रकाश शर्माले तत्कालीन प्रधानमन्त्री केपी शर्माओलीमाथि गिरीबन्धु जग्गा प्रकरणमा भएको नीतिगत घोटालाका बारेमा प्रश्नहरू उठाएका छन् । बिहीबार बसेको प्रतिनिधिसभा बैठकको विशेष समयमा बोल्दै सांसद शर्माले अध्यक्ष ओलीका साथै गृहमन्त्री रवि लामिछानेमाथि समेत सो प्रकरणमा छानबिन गर्न चुनौती दिएका छन् ।
उनले गिरीबन्धु टी स्टेटको जग्गा सट्टाभर्ना गर्नेबारे ओली नेतृत्वको सरकारले ल्याएको विधेयकमाथि कांग्रेसले संशोधन प्रस्ताव दर्ता नगरेको भनेर भ्रम फैलाएको बताउँदै कांग्रेसले राखेको संशोधनबारे जानकारी गराए ।
सर्वोच्च अदालतले गिरीबन्धु प्रकरणमा फैसला गर्दै नीतिगत भ्रष्टाचार भएको तथ्य आएपछि पनि कांग्रेसले आफ्नो धारणा नराख्दै कांग्रेसमाथि ओली खनिएको भन्दै उनले आपत्ति जनाए ।
उनले भने– ‘हामी बोलेकै थिएनौं तर उहाँले फायर खोल्नुभयो कि कांग्रेसले ७० बिघा जग्गा बेचेर कमिसन खायो । के यो आरोप सही थियो ? रौद्र रूपमा धारण गरेर उहाँले कांग्रेसमाथि आरोप लगाएपछि मौन धारण गर्न सकिएन, प्रतिवाद गरियो । प्रतिवाद गरेपछि भनियो कि कांग्रेसले लिखित रूपमा माफी माग्नुपर्छ । हिजो संविधान लेख्न बस्दा सँगसँगै बसेका थियौँ । झुटो आरोप लगाउनका लागि संविधानको अधिकार दुरुपयोग गर्न मिल्ने ? अनि सही प्रतिवाद गर्नका लागि नेपाली कांग्रेसलाई बन्देज अनुभूति गर्ने यो हुन सक्दैनथ्यो । त्यसैले हामीले भन्यौँ यो नेपाल हो उत्तर कोरिया होइन । कसैले झुटो आरोप लगाउँछ भने नेपाली कांग्रेसले सही प्रतिवाद गर्न सक्दछ ।’
उनले गृहमन्त्री रवि लामिछानेलाई गिरीबन्धु जग्गा प्रकरणमा भएको नीतिगत भ्रष्टाचारको छानबिन गर्न चुनौती समेत दिए । उनले ओलीले कांग्रेसलाई लगाएको ७० बिघा जग्गा बेचेर खाएको आरोपको छानबिन गर्न गिरीबन्धुको फाइल खोल्न गृहमन्त्री तयार हो भन्दै प्रश्न गरे ।
उनले भने– ‘म जान्दछु, गिरीबन्धुको फाइल खोल्न होइन बोल्न पनि उहाँ सक्नुहुन्न । बोल्न सक्नुभएको भए शिक्षामन्त्री विरुद्धको शब्द फिर्ता लिनुस् सम्माननीय पूर्वप्रधानमन्त्री ज्यू, उहाँले दमदार ढंगले भन्न सक्नुहुन्थ्यो । नम्रतापूर्वक पनि उहाँले भन्न सक्नुभएन ।’
सांसद शर्माले शिक्षामन्त्री श्रेष्ठको पक्षमा बोल्दै विवाह कोसँग कहिले गर्ने नितान्त व्यक्तिगत कुरा भएको बताउँदै उदाउँदै गरेको राजनीतिक नेतृत्वलाई हतोत्साही गर्न नहुने बताए । प्रधानमन्त्रीको उचाइमा पुगेको मान्छेले सम्मानित ठाउँमा बस्नुपर्ने बताउँदै जहाँ पायो त्यही जोसँग पनि जोरी खोज्ने तरिकाले प्रस्तुत हुन नहुने टिप्पणी गरे ।
सांसद शर्माले एमाले कति लोकतान्त्रिक छ भन्ने कुरामाथि प्रश्न उठाउँदै कांग्रेस सभापतिमा लडेर पराजित भएका कृष्ण सिटौला राष्ट्रियसभाको संसदीय दलको नेता रहेको र रामचन्द्र पौडेल राष्ट्रपति रहेको बताउँदै एमालेको अध्यक्षका प्रतिस्पर्धी भीम रावललाई कहाँ पुर्याइयो भन्दै प्रश्न गरे ।
