गुलरिया, बैशाख १३ गते / संस्थागत विद्यालयहरूलाई गुलरिया नगरपालिकाले छात्रवृत्ति सम्बन्धित सुचना सार्वजनिक रुपमा प्रकाशित गर्न निर्देशन दिएको छ। गुलरिया नगर छात्रवृत्ति व्यवस्थापन समितिको २०८० चैत्र २३ गतेको निर्णय अनुसार संस्थागत विद्यालय छात्रवृत्ति व्यवस्थापन कार्यविधि २०८० को दफा ६ को निर्णय अनुसार हुन आउने छात्रवृत्ति सम्बन्धित सूचना सार्वजनिक रुपमा प्रकाशित गर्न निर्देशन दिएको गुलरिया नगरपालिकाको शिक्षा युवा तथा खेलकुद शाखाका प्रमुख सतिश यादवले बताए। आज बैसाख १३ गते बिहिबार गुलरिया नगरपालिकाको शिक्षा युवा तथा खेलकुद शाखाले गुलरिया भित्रका सबै १३ वटा संस्थागत विद्यालयहरूलाई छलफलममा निमन्त्रण गरेको थियो । आजको बैठकमा कार्यविधि बमोजिम सम्पूर्ण संस्थागत विद्यालयहरूलाई पुन छात्रवृत्ति सम्बन्धि १५ दिने सूचना प्रकाशित गर्न छलफलमा सहमति भएको शिक्षा युवा तथा खेलकुद शाखाका प्रमुख यादवले जानकारी दिए।
साथै सम्पूर्ण विद्यालयले बिद्यार्थीको एक पटक भर्ना शुल्क लिएपछि पुन: भर्ना शुल्क लिन नपाउने र यदि लिएको भए अभिभावकलाई रकम फिर्ता गर्न निर्णय भएको समेत यादवले बताए।
छलफलमा गुलरिया नगरपालिकाका नगरप्रमुख मुक्तीनाथ यादव, प्रमुख प्रशासकिय अधिकृत ओमकार शाह लगायत संस्थागत विद्यालयहरूका प्रतिनिधिहरुको समेत उपस्थिति रहेको थियो ।
