मधुवन, चैत २ गते (माउण्टेनसमाचार) / मधुवन नगरवासी विरामी भएको अवस्थामा माग अनुसारको रगत अभाव हुन नदिन मधुवन नगरपालिकाका नगरप्रमुख तेजबहादुर भाटको पहलमा मधुवन नगरपालिका बडा नं ६ मा मधुवन रक्त संकलन तथा भण्डारण केन्द्र स्थापना गरिएको छ।
नेपाल रेडक्रस सोसाइटी मधुवन ख उपशाखा बर्दियाको भवनमा मधुवन नगरपालिकाको आर्थिक सहयोगमा रक्त संकलन भण्डारण केन्द्र स्थापना भएको नेपाल रेडक्रस सोसाइटी मधुवन ख उपशाखाका अध्यक्ष अम्बर के.सी. ले बताए। पुस २८ गते देखि रगत संकलन सुरुवात गरिएको र मधुवन नगरपालिकाको ७ लाखको सहयोगमा करिब १ सय पोका रगत भण्डारण गर्न सक्ने गरि फ्रिज रहेको साथै २ कर्मचारी समेत राखिएको केसीले जानकारी दिए।
रक्त संकलन केन्द्र स्थापना संगै मधुवनका जनता रगतका लागि नेपालगंज र गुलरिया धाउन नपरुन र आफ्नै ठाउँबाट रगत सहज रुपले प्राप्त गरुन भन्ने उद्देश्यका साथ रगत संकलन स्थापना गरिएको नगरप्रमुख तेजबहादुर भाटले बताए।
