कोहलपुर, फागुन २६ गते ( माउण्टेनसमाचार) / दलितका लागि दलित आन्दोलन नेपाल द्वारा कोहलपुर चौराहामा आज फागुन २६ गते शनिबार दलित जागरणसभा सम्पन्न भएको छ ।
दलितका लागि दलित आन्दोलन नेपाल द्वारा आयोजित कार्यक्रममा “आफ्नो लागि आफैँ” भन्ने नारासहित कोहलपुरमा जागरण सभा सम्पन्न भएको हो ।
जागरण सभामा “सदियौं देखि दलित अपहेलित भएर बाँचिरहेकाले अब आफ्नो अधिकारका लागि आफैँले आवाज उठाउनु पर्ने बेला आएको दलितका लागि दलित आन्दोलन नेपालका अध्यक्ष खगेन्द्र सुनारले बताए।
२१औँ शताब्दीमा समेत दलित राज्यको मूल प्रवाहमा आउने नसकेको दुखेसो पोख्दै सुनारले चिन्ता व्यक्त गरे । सभ्य र सम्मानित समाजका लागि जातीय विभेद् अन्त्य हुनु पर्ने भए पनि दलित समुदायले अहिले पनि छुवाछुत जस्तो कूप्रथा सहनु परेको सुनारको भनाइ छ । दलित अधिकारको माग गर्नु अरु समुदायको अधिकार नखोस्नु र उनीहरुलाई अपमानित नगर्नु भएको भन्दै सुनारले भने, ‘अधिकारका लागि गाउँगाउँबाट आवाज उठाउनु पर्छ ।’ अधिकारका लागि नबोल्दासम्म विभेद्को चपेटामा पिल्सिनु पर्ने भन्दै अब दलितहरु एक भएर अगाडि बढ्नु पर्ने सुनारले बताए।
डा. निर्मल विश्वकर्माले दलितलाई राज्यले अधिकार सम्पन्न गराउनु पर्ने बताए ।
त्यस्तै दलित महिना नेतृ तथा पूर्व खजुरा गाउँपालिकाकी उपाध्यक्ष एकमाया विकले व्यवस्था परिवर्तन भए पनि दलितहरुको अवस्था उस्तै रहेको बताइन् ।
यसै पनि दलित तथा अन्य सीमान्तकृत समुदायले अहिलेको व्यवस्थामा पनि बहिष्करण महसुस गरेको दलित अगुवाहरुको भनाइ रहेको छ । संविधानले दलितको अधिकारको बिषयमा केही सुधार हुने आशा जगाएको थियो तर पार्टी नेताहरूले संविधानका प्रावधानहरूको उपेक्षा गर्ने गरेको उनीहरुको भनाइ छ । यस्तो उपेक्षित व्यवहार संविधान विरोधी भएको उनीहरुको ठहर छ ।
