बर्दिया, फागुन १५ गते / अख्तियार दुरुपयोग अनुसन्धान आयोगमा यस आर्थिक बर्षमा बर्दिया जिल्लाका ५० वटा उजुरीहरु दर्ता भएको आज एक कार्यक्रमका बिच जानकारी गराईएको छ।
अख्तियार दुरुपयोग अनुसन्धान आयोगको वुटवल सम्पर्क कार्यालय नेपालगंजले बर्दियाको गुलरियामा आयोजना गरेको एक कार्यक्रममा बर्दियाका ८ ओटै पालिकामा चालु यस आर्थिक वर्षको फागनु ११ गते सम्ममा ५० वटा उजुरी परेको जनाइएको छ ।
गत वर्षमा परेको जम्मा २१ वटा उजुरी मध्ये ६ वटा मात्र फर्छौट भएको र यस वर्षको ५० मध्ये १७ वटा उजुरीहरु फर्छौट भएको अख्तियार दुरुपयोग अनुसन्धान आयोगको वुटवल कार्यालयले जानकारी दिएको छ। बर्दियाको आठ वटा पालिका मध्ये यस वर्ष सबै भन्दा बढी १० वटा उजुरी बढैयाताल गाउँपालिकाको रहेको तथ्यांकले देखाएको छ भने गत दुइ वर्षको तथ्यांक अनुसार हाल सम्म परेका ७१ वटा उजुरी मध्ये २३ वटा उजुरीहरु फर्छौट भएका छन भने ४८ वटा उजुरी फर्छौट हुन बाँकी रहेको अख्तियार दुरुपयोग अनुसन्धान आयोग नेपालगंजका प्रमुख गणेश बहादुर अधिकारीले जानकारी दिनुभयो ।
यस्तै गुलरिया नगरपालिकामा ५, बढैयाताल गाउँपालिकामा १०, गेरुवा गाँउपालिकामा ६, राजापुर नगरपालिकामा ८ मधुवन नगरपालिकामा ३ ठकुरबाबा नगरपालिकामा ९, बारबर्दिया नगरपालिकामा उजुरी नपरेको र बाँसगढी नगरपालिकामा ९ वटा उजुरीहरु परेको अधिकारीले बताउनु भयो । भ्रष्टाचार नियन्त्रण र शुसासन प्रर्बद्धन सम्बन्धी गुलरिया नगरपालिका स्तरीय अन्तरकृया कार्यक्रममा तथ्यांक प्रस्तुत गरिएको हो ।
गुलरिया नगरपालिकाका नगरप्रमुख मुक्तीनाथ यादवले पालिकामा भ्रष्टाचार रोक्न सबैको सल्लाह र सुझाव जरुरी रहेको बताउनु भएको छ ।
