बर्दिया,माघ १५ (माउण्टेनसमाचार) / गुलरिया बजारमा दिनदहाडै चोरी भएको छ । गुलरिया नगरपालिका–७ भन्सार रोड बाईपास चोक नजिकै मेराज जनरल स्टोरमा सोमबार दिउँसो चोरी भएको हो ।
बर्दियाको सदरमुकाम गुलरिया बजारमा दिनदहाडै चोरीका घटना बढ्न थालेपछि व्यवसायी त्रसित भएका छन् । दिउँसो पसलको पछाडिबाट पसेर पसलमा राखिएको बाकसमा भएको नगद चोरी भएको जनाईएको छ ।
केही दिन अघिबाट गुलरिया बजार क्षेत्रमा चोरीका घटना भईरहेका छन् । माघ २ गते च्यामुलाल चौधरी र आचार्य किराना पसलमा एकै दिन चोरी भएको थियो । चौधरीको घरबाट सुनको सिक्री, मंगलसुत्र र आचार्य किराना पसलबाट ३ लाख १० हजार बराबरको रिचार्जसहित नगद चोरी भएको थियो । त्यसैगरि पौष २५ गते विजय श्रीवास्तवको घरबाट मोटरसाईकल चोरी भएको थियो ।
