अध्यात्म आदर्शका हे महागायक!
पूर्वीय काव्य जगतका हे महानायक!
सतत नमन छ तिमीलाई
तिम्रो कलालाई ,साधनालाई
कल्पनालाई ,सिर्जनालाई
हे महाकवि !
कालजयी छ तिम्रो
अनमोल कला सिर्जना
जहाँ बगिरहेछ हरदम
ज्ञान,विवेक ,भक्ति
र वैराग्यको मधुर धारा
गरेर जसको रसपान
कृतार्थ भइरहेछ दुनियाँ
आनन्द बागमा झुलिरहेछ
विश्व जगत सारा।
हे विराट कल्पनाका धनी !
हे आदिकवि !
जगतलाई मर्यादा पढाउन राम रच्यौ
नारीको गरिमा बढाउन सीता रच्यौ
प्रणय ,उत्सर्ग र कर्तव्यको कथा रच्यौ
वीरता ,समर्पण र आदर्शको गाथा रच्यौ
हे महर्षि !हे जगत गुरु !
राजा ,पति ,पुत्र
पत्नी ,भाइ अनि मित्र
कस्ता हुन्छन्
शिक्षा सिकाउन
सत्ता र शक्तिको उन्माद
सम्पत्ति र यौवनको मात
प्राप्तिको आशा
भोगको लालशा
नाशवान हुन्छ भन्ने
दीक्षा सिकाउन
हे कवि !तिमीले रामायण रच्यौ
मर्यादा पुरुषोत्तम राम रच्यौ
तिम्रो अनुपम काव्यशिल्पले
आज जनजनमा राम छन्
जगतमा रामको नाम छ
लोकमा रामलाई चिनाउने
हे वाल्मीकि
तिमीलाई लाखौंलाख प्रणाम छ।
