बर्दिया, माघ ८ गते ( माउण्टेनसमाचार) / बारबर्दिया नगरपालिकाले नगरको १४ औं नगरसभाबाट आज बारबर्दिया नगरपालिकामा थारु भाषालाई पाठ्यक्रममा समावेश र आर.सी. मेमोरियल अस्पताललाई बारबर्दिया नगर अस्पताल नामाकरण गर्ने निर्णय गरेको छ ।
आज बारबर्दिया नगरपालिकाको जयनगरको पालिका भवनमा भएको १४ औं नगरसभाबाट आज नगरपालिका भित्रका हरेक सामुदायिक विद्यालय र निजी विद्यालयमा स्थानीय थारु भाषाको पाठ्यक्रमको सुरुवात गर्ने गरि निर्णय गरिएको बारबर्दिया नगरपालिकाका नगर प्रमुख छविलाल चौधरीले बताए।
आजको नगरसभामा विद्यालयमा थारु भाषालाई पाठ्यक्रममा समावेश गर्ने गरि आएको प्रस्ताव सभाहलबाट हुबहु पारित भएको नगरप्रमुख चौधरीले बताए। नया कक्षा सञ्चालन संगै कक्षा १ देखि थारु भाषा अनिवार्य रुपमा विद्यालयमा पठनपाठन हुने चौधरीले भने ।
बर्दिया जिल्लामा ५३ प्रतिशत थारु बाहुल्य रहेको जिल्ला हो भने बारबर्दिया नगरपालिका भित्र थारु बाहुल्य करिब ७४ प्रतिशत रहेको छ।
यसै गरि बारबर्दिया नगरपालिका को जयनगरमा रहेको आर.सि. मेमोरियल अस्पतालको नाम परिवर्तन गरि बारबर्दिया नगर अस्पताल नामकरण गर्ने प्रस्ताव आएको र सो प्रस्ताव पनि सबैको समर्थनमा पारित हुदै अब आर.सि. मेमोरियल अस्पतालको नाम परिवर्तन भई बारबर्दिया नगर अस्पताल रहने समेत नगरप्रमुख चौधरीले भने।
