काठमाडौं, माघ ५/बोक्सीको आरोप लगाएर हत्या गरी फरार भएका दुईजना १५ वर्षपछि पक्राउ परेका छन्। काभ्रेको रोशी गाउँपालिका-३ का ४४ वर्षीय टंकबहादुर मगर, ४२ वर्षीय सन्तबहादुर मगर पक्राउ परेका हुन्। उनलाई काठमाडौं उपत्यका अपराध अनुसन्धान कार्यालयको टोलीले पुस २४ गते पक्राउ गरेको हो।
पक्राउ परेका टंकबहादुरको स्वास्थ्यमा समस्या आएकाले उपचार सकेर शुक्रबारमात्र जिल्ला अदालत काठमाडौंमा बुझाइएको काठमाडौं उपत्यका अपराध अनुसन्धान कार्यालयका प्रहरी उपरीक्षक मिलन केसीले जानकारी दिए।
उनीहरूले २०६५ असोज २९ गते शिखर आम्बोटे गाविस -२ हाल रोशी गाउँपालिका-३ को चमारसिंह मगर भन्ने जनकबहादुर मगरलाई बोक्सीको आरोप लगाई कुटपिट गरी हत्या भएको थियो। त्यसयता उनीहरू फरार थिए। लामो समयको खोजीपछि प्रहरीले १५ वर्षपछि पक्राउ गरेको एसपी केसीले जानकारी दिए।
