बर्दियाको ठाकुरबाबा नगरपालिका वडा नम्बर ८ का निवर्तमान वडा अध्यक्ष निम प्रसाद थारुको निधन भएको छ ।
२०७४ सालको स्थानीय तह निर्वाचनमा माओवादी पार्टीबाट ठाकुरबाबा नगरपालिका वडा नम्बर ८ को वडा अध्यक्षमा निर्वाचित हुनुभएका निवर्तमान वडा अध्यक्ष थारुको ४९ वर्षको उमेरमा हृदयघातका कारण निधन भएको पारिवारिक श्रोतले जनाएको छ ।
निवर्तमान वडा अध्यक्ष निम प्रसाद थारुलाई यसअघि पनि हृदयाघात भएपछि मुटुको भल्भको शल्यक्रिया भएको थियो, उहाँलाई सनिवार राति हृदयाघात भएपछि उपचारका लागि अस्पताल लैजाने क्रममा निधन भएको माओवादी केन्द्र ठाकुरबाबा नगर अध्यक्ष नेत्रराज आचार्यले जानकारी दिनुभयो ।
२०४७ सालदेखि मुक्तिमोर्चामा आबद्व रहँदै नेकपा माओबादीमा रहेका बेला द्वन्द्वकालमा कुटपिटबाट घाइते भएपछि संकटकालमा विस्थापित भई भारतको गोवा जानू भएको थियो ।
देश संघिय पुनः संरचनामा भएसंगै पहिलो पटक २०७४ सालको स्थानीय तह निर्वाचनमा ठाकुरबाबा नगरपालिका वडा नम्बर ८ बाट वडा अध्यक्षमा निर्वाचित हुनुभएको थियो । उहाँका पत्नी, २ छोरी, १ छोरा छन् ।
