काठमाडौँ,पौष ११ / नेपाल बैंक लिमिटेडको डिल्लीबजार पूर्वशाखा प्रबन्धक भूपराज कोइराला बैंकको रकम हिनामिना गरेको आरोपमा दोषी ठहर भएका छन् । विशेष अदालतको खुसी प्रसाद थारु, रामबहादुर थापा र मुरारीबाबु श्रेष्ठको इजलासले कोइरालालाई दोषी ठहर गरेको हो ।
२०७६ सालमा बैंकलाई नभएको दायित्व सिर्जना गरी अनुचित लाभ लिएको आरोपमा कोइरालालाई केन्द्रीय अनुसन्धान ब्युरोको टोलीले पक्राउ गरेको थियो । कोइरालामाथि बैंक सिस्टम ह्याक गरी बैंकमा जम्मा गर्नुपर्ने ब्याज आफ्नो निजी खातामा जम्मा गरेको आरोप थियो ।
गत मङ्सिर २६ गते कोइरालामाथिको कसुर कायम भएकोमा उनलाई ५४ लाख ८४ हजार जरिवाना तथा त्यति नै बिगो नेपाल बैंक लिमिटेडले असुल उपर गरेर लिने आदेश भएको छ ।
अख्तियार दुरुपयोग अनुसन्धान आयोगले २०७७ असार २१ गते विशेष अदालतमा कोइरालाविरुद्ध मुद्दा दायर गरेको थियो । उनले टेलर आइडी र सिस्टम सुपर युजरको दुरुपयोग गरेर अनधिकृत रूपमा आफ्नो खातामा रकम जम्मा गरेको अभियोग आयोगको थियो । साभार रातोपाटी
