बर्दिया, पुस २ गते( माउण्टेनसमाचार) / मंसिर ३० गते देखि आयोजित दोस्रो स्व.अजय श्रेष्ठ स्मृति क्रिकेट २०८० को आइतबार भएको खेलमा अभानी क्रिकेट क्लब र नेपालगन्ज ११ विजयी भएका छन ।
आइतबार भएको अभानी क्रिकेट क्लब र होराइजन क्लब बिच भएको खेलमा अभानी क्रिकेट क्लब ४ विकेटले विजयी भएको छ। पहिलो ब्याटिङ गरेको होराइजन निर्धारित २० ओभरको खेलमा १७ ओभर मात्र खेलि ८० रनमा नै अलआउट भएको थियो । होराइजनका लागि निर्मल थापाले ३२ बलमा १९ रन बनाएका थिए भने अन्य ब्याटरले दोहोरो अंक छुन सकेका थिएनन् । होराइजन क्लब को ब्याटिङ धरासायी गराउँदै अभानी क्रिकेट क्लब का रिजान ढकालले १२ रन दिएर ४ महत्वपूर्ण विकेट लिन सफल भएका थिए भने सुभ कंसकारले ७ रन दिएर ३ विकेट लिएका थिए। ८१ रनको लक्ष्य लिएर आएको अभानी क्रिकेट क्लबका सुमित महर्जनको २५ बलमा ३५ रन र सुमन सुनारको १६ रनको आकर्षक ब्याटिङको मद्दतले अभानी क्रिकेट क्लबले १० ओभर ३ बलमा ८१ रन बनाउँदै प्रतियोगिताको आफ्नो पहिलो जित निकाल्न सफल भएको छ । अभानी क्रिकेट क्लबलाट १२ रन दिएर ४ विकेट लिएका रिजान ढकाल म्यान अफ द म्याच घोषित भएका थिए।
यस्तै गरि आइतबार नै भएको अर्को खेलमा नेपालगन्ज ११ ले मधुवन क्रिकेट क्लबलाई १८ रनले पराजित गरेको छ। पहिलो ब्याटिङ गरेको नेपालगन्ज ११ ले निर्धारित २० ओभरमा १ सय १४ रन बनाउन सफल भएको थियो । नेपालगन्ज ११ का तर्फबाट संदिप नेपालीले ३८ बलमा ४३ रन बनाएका थिए भने मो. सदाव अन्सारीले १४ बलमा २० रन बनाएका थिए।
बलिङमा मधुवन क्रिकेट क्लबका तर्फबाट बलिङ गर्दै समिर रानाले १८ रन दिएर २ विकेट लिएका थिए भने नितिन न्यौपाने र हिमांशु शाहिले १/१ विकेट लिन सफल भएका थिए।
१ सय १५ रनको लक्ष्य लिएर आएको मधुवन क्रिकेट क्लब १९ ओभर १ बल खेल्दै ९६ रन मै अलआउट भएको थियो । मधुवनका तर्फबाट ब्याटिङमा निखिल खत्रीले ४३ बलमा २९ रन को योगदान दिएका थिए भने नितिश न्यौपानेले २४ बलमा २८ रन बनाएका थिए। मधुवन को ब्याटिङ धरासायी गर्नु नेपालगन्ज ११ का रोसन साहु र मो.अवुजर अन्सारीले समान ३/३ विकेट लिएका थिए। ३ विकेट लिएका नेपालगन्ज ११ का रोसन साहु म्यान अफ द म्याच घोषित भएका थिए।
