भारत, मंसिर २७ /भारतको लोक सभामा बुधबार दुई जना व्यक्ति अनधिकृत रूपमा प्रवेश गरेका छन्। बुधबार दिउँसो चलिरहेको लोक सभामा दुई जना अनधिकृत रूपमा प्रवेश गरेको भारतीय ‘द हिन्दु’ ले जनाएको छ।
ती व्यक्तिहरूले भित्र प्रवेश गरी पहेँलो रङको ग्यासको बट्टा फालेका थिए। उक्त ग्यास सदन हलमा छरिएको थियो। तर त्यो ग्यास हानिकारक नभएको प्रहरीको अनुसन्धानबाट देखिएको हिन्दुले समाचारमा उल्लेख गरेको छ।
चलिरहेको सदनमा यसरी अनधिकृत व्यक्तिहरू प्रवेश गरेपछि सदनको सुरक्षामाथि प्रश्न उठेको छ। सभामुख ओम बिरलाले उक्त घटनापछि सदन स्थगित गरेका थिए।
सुरक्षाको कमजोरीबारे छलफल गर्न सभामुख बिरलाले सबै दलका नेताहरूको बैठक बोलाएका थिए। उनले बैठकमा चार जनालाई प्रहरीले पक्राउ गरिसकेको समेत जानकारी दिए। दुई जना लोक सभाभित्र र दुई जना बाहिरबाट पक्राउ परेका थिए। घटनाबारे लोक सभा र दिल्ली प्रहरीले छानबिन अगाडि बढाएको छ।साभार सेतोपाटी
