काठमाडौं,मंसिर २६/ भेपमा लुकाएर तस्करी गरी ल्याएको नौ किलो सुन चोरी गरेको मुद्दामा पुर्पक्षको लागि थुनामा रहेका व्यक्तिलाई छुटाइदिन्छु भन्दै ठगी गरेको आरोपमा प्रहरीले दुई जनालाई पक्राउ गरेको छ ।
नेपाल प्रहरीको केन्द्रीय अनुसन्धान ब्युरोले दुई जनालाई पक्राउ गरेको प्रवक्ता एवं एसपी नवराज अधिकारीले बताए । भोजपुर घर भई नागार्जुन नगरपालिका–१ रानीवन बस्ने २६ वर्षीय रितु राई र बर्दिया घर भई रानीवन बस्ने २१ वर्षीय निरेश चौधरी पक्राउ परेका छन् ।
उनीहरूले पुर्पक्षको लागि जगन्नाथदेवल थुनामा रहेका वीरेन्द्रनगर नगरपालिका–५ घर भएका रेवन्त खड्काको मुद्दा मिलाइदिने बताएका थिए ।
रेवन्तलाई छुटाइदिन्छु भन्दै उनका बुवा अमर बहादुरबाट पटक–पटक गरी ९९ लाख ७५ हजार रुपैयाँ लिएको आरोप छ । यसरी पैसा लिएर ठगी गरेको उजुरीपछि ब्युरोले सोमबार दुई जनालाई पक्राउ गरेको हो ।
राई र चौधरीमाथि आपराधिक विश्वासघात तथा ठगी मुद्दामा अनुसन्धान अघि बढाएको छ । रेवन्त त्रिभुवन विमानस्थल भन्सार कार्यालयका नायव सुब्बा थिए । उनी विमानस्थलमा कार्यरत रहँदा २०७९ पुस १० गते फ्लाई दुबईबाट आएका चिनियाँ नागरिक ली हानसङले लगेजमा भेपमा सुन लुकाएर ल्याएका थिए ।
भेप जफत भएको र त्यसभित्र सुन रहेको थाहा पाएपछि रेवन्त लगायतले मिलेर सुन चोरी गरेको आरोप छ । उक्त नौ किलो सुन ६ करोड रुपैयाँमा भारतीय व्यापारीलाई बेचेको खुलेको थियो । जसबापत रेवन्तले बैंकमा ६५ लाख र १० लाख रुपैयाँ नगद नै लिएको ब्युरोको अनुसन्धानबाट खुलेको थियो ।
उनीसहित चोरीमा संलग्न व्यक्तिहरूलाई प्रहरीले आपराधिक विश्वासघात र संगठित अपराध कसुरमा मुद्दा चलाएको थियो ।
त्यस कसुरमा काठमाडौं जिल्ला अदालतले पुर्पक्षको लागि थुनामा पठाएको थियो । यही मुद्दामा ब्युरोले पुरक अनुसन्धान गरी पूर्व सभामुख कृष्णबहादुर महराका छोरा राहुल महराको संलग्नता देखिएको भन्दै पक्राउ गरेको थियो । हाल उनी पनि पुर्पक्षको लागि थुनामा छन् । साभार सेतोपाटी
