काठमाडौं,मंसिर २३ /बर्दियाको गुलरिया नगरपालिका वडा नम्बर ४ स्थित बबई नदी किनारको बगहीमा अवस्थित भुकम्प प्रभावित कृष्ण प्रणामी मन्दिर प्राणनाथ आश्रम पुर्ननिर्माणको लागि सहयोग संकलन गर्न श्रीममदतारतम सागर पाठ परायण एवम् श्रीमदभागवत सप्ताह ज्ञानयज्ञ शुभारम्भ गरिएको छ । स्थानिय समुदायले निर्माण गरेको मन्दिर स्थापनाको ३१ औं बार्षिक उत्सवको अवसरमा ज्ञान महायज्ञ शुरु गरिएको हो ।
लुम्बिनी प्रदेस बर्दिया क्षेत्र नम्बर १ (ख) का सांसद राजकुमार चौधरीको प्रमुख आतिथ्यतामा भएको ज्ञानयज्ञको समुद्घाटन समारोहमा प्रमुख अतिथी चौधरीले आफ्नो क्षेत्र विकास कोषबाट १५ लाख रुपैया सहयोग गर्ने प्रतिवद्धता गर्नु भएको छ । समाजमा सकारात्मक सत्मार्गको लागि धार्मिक अनुष्ठानहरु आवस्यक रहेको बताउँदै आफूले जस्तोसुकै सहयोग गर्न पनि तयार रहेको बताउनु भएको छ ।
गुलरिया नगरपालिका वडा नम्बर ४ का वडाध्यक्ष सुरेश गौतमले वडामा आयोजना गरिएको कार्यक्रममा सवै वडावासीहरुलाई सहभागीता जनाउन आग्रह गर्नु भएको छ । मंसिर २१ गतेदेखि शुभारम्भ गरिएको ज्ञानयज्ञको २७ गते पूर्णाहुती हुने आयोजकले जनाएको छ ।
तारा माताको प्रमुख बाचकत्वमा हुन लागेको ज्ञानयज्ञको सहायक वाचक पण्डीत कृष्णजी महाराज हुनुहुन्छ । कलश यात्रा मार्फत गाउँ परिक्रमा गरि शुभारम्भ गरिएको यज्ञमा दैनिक विहान ६ देखि ७ बजेसम्म मंगल आरती, ७ बजेदेखि ८ बजेसम्म परायण प्रारम्भ, ९ देखि १० बजेसम्म भोजन प्रसाद, ११ बजेदेखि दोस्रो आरती पश्चात विशेष अतिथीबाट कथा वाचन, १२ बजेदेखि ३ बजेसम्म श्रीमदभागवत कथा बाचन, वेलुकी ६ बजेदेखि ७ बजेसम्म सन्ध्या कालिन सेवा, ७ देखि ९ बजेसम्म प्रवचन र मंसिर २८ गते प्रसाद भण्डारा हुने आयोजक कृष्णप्रणामी मन्दिर प्राणनाथ आश्रमले जनाएको छ । ज्ञानयज्ञमा अन्नदान, तुलादान, भुमिदान एवम् दीक्षा ग्रहण गर्न सकिने प्रमुख बाचक तारा माताले जानकारी दिनु भएको छ । साभार चुरेकुञ्ज
