बर्दिया,मंसिर १ (माउण्टेनसमाचार)/ गत कात्तिक २७ गते लक्ष्मी पुजाको दिन मध्यरातमा गुलरिया नगरपालिका–६ का २० वर्षिय बरुण घिमिरेमाथि खुकुरीलगायत अन्य हात हतियार प्रयोग गरि मरणासन्न हुने गरि कुटपिट भयो । कुटपिटबाट गम्भिर घाईते भएका घिमिरेलाई उपचारको लागि नेपालगंज लैजाँदा लैजाँदै बाटोमा राति साढे २ बजे मृत्यु भयो ।
घिमिरेमाथि चक्कु, नोख, चिर्पटा र हेल्मेटलगायत हातहतियार प्रहार गरिएको प्रहरीको प्रारम्भिक अनुसन्धानबाट खुलेको छ । गुलरिया नगरपालिका–५ जुस फ्याक्ट्री नजिक घिमिरेमाथि निर्घात कुटपिट भएको थियो ।
हत्या आरोपमा प्रहरीले अहिलेसम्म आठ जनालाई पक्राउ गरिसकेको छ । अझै तीन जना फरार रहेकोे प्रहरीले जनाएको छ ।
गुलरिया नगरपालिका–६ का २३ वर्षिय सुलभ थापा, वडा नंम्बर ५ का १९ वर्षिय दिपेश बुढामगर, वडा नंम्बर ६ का २४ वर्षिय धिरज ठाकुर, वडा नंम्बर ८ का १९ वर्षिय सन्दिप थारु र १९ वर्षिय दिनानाथ चौधरी पक्राउ परेका छन् । त्यसैगरी घिमिरेको हत्यामा सहयोगी भुमिका खेल्ने गुलरिया नगरपालिका–६का १८ वर्षिय रक्षक भन्ने रोशन शाह, वडा नंम्बर ४ का १८ वर्षिय निश्चल थापा क्षेत्री र ठाकुरबाबा नगरपालिका–३ का २३ वर्षिय तर्क भण्डारी पक्राउ परेका छन् । घटनामा संलग्न गुलरिया नगरपालिका–६ का १९ वर्षिय सुरेश भन्ने सुयस थापा, वडा नंम्बर ५ का २० वर्षिय आलोक आश्रित र वडा नंम्बर ४ का १९ वर्षिय सुमन सुनार अझै फरार रहेको प्रहरीले शुक्रबार जनाएको छ ।
उक्त समुहले मृतकका दुई साथीलाईसमेत निर्घात कुटपिट गरेका थिए । कुटपिटबाट गेरुवा गाउँपालिका–६ का २१ वर्षिय मोहित पुन र गुलरिया नगरपालिका–६ का रञ्जन कुँवर घाईते रहेको प्रहरीले जनाएको छ ।
घटनाको मुख्य आरोपी सुलभ थापा रहेको खुलेको छ । प्रहरीका अनुसार एक वर्ष अघि थापा र घिमिरेबिच विवाद भएको थियो । पुरानो रिसिबीको बदला लिने उदेश्यले थापाले यस्तो घटना घटाएको प्रहरीको प्रारम्भिक अनुसन्धानबाट खुलेको छ । फरार तीन जनाको खोजी कार्य भईरहेको जिल्ला प्रहरी कार्यालयका सुचना अधिकारी प्रहरी नायव उपरीक्षक तुल्सीराम अर्यालले जानकारी दिए ।
