बर्दिया,कार्तिक २०(माउण्टेनसमाचार) / जाजरकोटका भुकम्प पिडितलाई गुलरिया नगरपालिकाले रु १० लाख बराबरको खाद्य सामाग्री दिने निर्णय गरेको छ । सोमबार बसेको कार्यपालिकाको बैठकले भुकम्प पिडितलाई रु १० लाख बराबरको खाद्य सामाग्री दिने निर्णय गरेको हो । गुलरिया नगरपालिकाको प्रकोप व्यवस्थापन कोषबाट व्यहोर्ने गरि रु १० लाख बराबरको खाद्य सामाग्री भुकम्प पिडितलाई सहयोग गर्ने निर्णय गरिएको छ ।
गत शुक्रबार राति जारकोटमा गएको शक्तिशाली भुकम्पले ठुलो धनजनको क्षति पु¥याएको छ । भुकम्प पिडितहरुको तत्कालको आवश्यकतालाई मध्यनजर गरि कार्यपालिकाले खाद्य सामाग्री दिने निर्णय गरेको गुलरिया नगरपालिकाका प्रवक्ता शुधांशु प्रकाश शर्माले बताए । भुकम्प प्रभावित क्षेत्रका सम्बन्धित निकायसंग समन्वय गरि आवश्यक खाद्य सामाग्री उपलब्ध गराउने प्रवक्ता शर्माले जनाए ।
त्यसैगरी गुलरिया नगरपालिकाको सोमबार बसेको कार्यपालिकाको बैठकले गुलरिया नगरपालिका–८ मा रहेको पशु हाट बजारको न्यूनतम रु १० लाख राखी पटक पटक सूचना प्रकाशन गरेपनि सूचनाको म्यादमा कुनै पनि दरभाउपत्र पेश नभई ठेक्का वन्दोवस्तीबाट सो हाटबजार ठेक्कामा लगाउन नसकिएको जनाएको छ ।
नगरपालिकाले कार्यालयबाटै कार्मचारी खटाई हाटबजार शुल्क असुली गरिएकोमा श्रावण देखि कार्यालयबाट असुल गरिएको प्रति हाटबजारको अनुपात रकमलाई आधार मानी अर्को ठेक्का वन्दोवस्त नहुँदा सम्मका लागी गुलरिय नगरपालिका– ६ का सुन्दर विष्टले प्रति हाट बजार १२ हजार ७ सय बुझाउने गरि पटके कर असुली गर्न दिने निर्णय समेत कार्यपालिकाले गरेको नगर प्रवक्ता शर्माले जानकारी दिए ।
