काठमाडौँ,कात्तिक १६/ नेपाली कांग्रेसका महामन्त्री गगन थापाले आममाफीको विषयलाई लिएर अदालतले गरेको निर्णय स्वागतयोग्य रहेको बताएका छन् । बिहीबार साँझ सामाजिक सञ्जालमा लेख्दै महामन्त्री थापाले मुद्दाको अन्तिम किनारा, पीडितको हकलगायतका विषयमा अदालतले फेरि बोलेको बताएका हुन् ।
सर्वोच्च अदालतले बिहीबार योगराज ढकाल भनिने रिगललाई आममाफी दिने राष्ट्रपति कार्यालयको निर्णय उत्प्रेषणको आदेशले बदर गर्दै निजलाई तत्काल पक्राउ गरेर थुनामा राख्न परमादेश दिएको थियो । सर्वोच्च अदालतको फैसलालगत्तै योगराज ढकाल भनिने रिगल पक्राउ परेका छन् ।
सर्वोच्चको परमादेशपछि थापाले भनेका छन्,‘यस्तो अवस्था आएको पहिलो पटक होइन । कानुनको छिद्र प्रयोग गरेर पटक–पटक यस खालका घटनाहरू दोहोरिने गरेका छन् । आम माफीका घटना आउँदा त्यसको विरोध गर्ने, घटना सेलाउँदै गएपछि बिर्सिने प्रवृत्तिलाई अब फेरि दोहोरिन दिनु हुँदैन । यस सम्बन्धमा जे–जसरी आम माफी दिने गरिएको छ त्यसले यो प्रणालीमै प्रश्न उठ्ने गरेको छ । यसमा मुद्दाको अन्तिम किनारा गर्नुमा न्यायपालिकाको भूमिका र पीडितको न्यायको विषयको आधारमा यो प्रणालीमै पुनर्विचार गर्नुपर्नेछ ।’
महामन्त्री थापाले आम माफीसँग सम्बन्धित सम्पूर्ण कानुनलाई एकीकृत गरेर व्याख्या गर्नुपर्ने र कानुनी छिद्रहरू टाल्नुपर्ने बताए । साभार रातोपाटीबाट
