बर्दिया,कात्तिक १२ (माउण्टेनसमाचार) / भारतबाट अबैध रुपमा ल्याईएको स्टिल र काँसको भाँडासहित अटो प्रहरीले नियन्त्रणमा लिएको छ । भारतबाट भन्सार छली ल्याईएको सामान र सो सामान ल्याउन प्रयोग गरिएको ईलेक्ट्रिक अटो आइतबार प्रहरीले नियन्त्रणमा लिएको हो । गुलरिया नगरपालिका–६ स्थितबाट प्रहरीले सामान र अटो नियन्त्रणमा लिएको जनाएको छ ।
भारतबाट अबैध रुपमा भित्रिने सामान सिमावर्ती क्षेत्रमा पक्राउ नपरि सदरमुकाममा पक्राउ पर्दा सिमावर्ती क्षेत्रमा खटिएका सुरक्षाकर्मी र भन्सारका कर्मचारीहरुको चरमलापरवाही देखिएको छ ।
स्टिल र काँसको भाँडा भारतबाट भन्सार छली चोरी पैठारी गरि ल्याई बेवारिसे अवस्थामा बरामद भएको प्रहरीको भनाई छ । प्रहरीका अनुसार मुल्य रु ३२ हजार ८ सय बराबरको स्टिल तथा काँसका भाँडा र सो अबैध सामान ल्याउन प्रयोग गरिएको भे २ स २५८९ नंम्बरको ईलेक्ट्रिक अटो मुल्य रु २ लाख गरि जम्मा २ लाख ३२ हजार ८ सय बराबरको सामान बरामद भएको छ ।
अबैध सामानसहित अटो नियन्त्रणमा लिई आवश्यक कारवाहीको लागि राजापुर भन्सार कार्यालय गुलरियामा बुझाएको जिल्ला प्रहरी कार्यालय गुलरियाका प्रहरी नायव उपरीक्षक तुल्सीराम अर्यालले जानकारी दिए ।
