काठमाडौं, असोज ३० / लगानी बोर्डको बैठकले संखुवासभामा निर्माणाधीन ९०० मेगावाट क्षमताको अरूण तेस्रो जलविद्युत परियोजनाको प्रवेशमार्ग सडकखण्डको समस्या समाधान गर्ने सम्बन्धमा मन्त्रिपरिषदमा सिफारिस गर्ने निर्णय गरेको छ। प्रधानमन्त्री एवं बोर्डका अध्यक्ष पुष्पकमल दाहाल ‘प्रचण्ड’ को अध्यक्षतामा असोज ३० मा सम्पन्न बोर्डको ५६ औं बैठकले यस्तो निर्णय गरेको हो।
विकासकर्ता एसजेभिएन पावर डेभलपमेन्ट कम्पनी प्राइभेट लिमिटेडले एक खर्ब ४४ अर्ब रूपैयाँ लागतमा निर्माण गरिरहेको यो परियोजनाको भौतिक प्रगति ६६.३ प्रतिशत र प्रसारणलाइनतर्फको प्रगति १५.४६ प्रतिशत छ। बैठकमा बोर्डका प्रमुख कार्यकारी अधिकृत सुशील भट्टले सम्पादित गतिविधिहरू तथा ५५ औं बैठकका निर्णय कार्यान्वयन अवस्था र ५६ औं बैठकका कार्यसूचीका सम्बन्धमा संक्षेपमा प्रस्तुतीकरण गरेका थिए। उनले परियोजना विकास सम्झौताका करारीय दायित्व पूरा गर्न सरकारको सिंगो संयन्त्रले प्रभावकारी कदम चाल्नुपर्ने धारणा राखे।
बैठकमा प्रधानमन्त्री प्रचण्डले यो परियोजना समयमा सम्पन्न गर्न चुस्त ढंगले काम गर्न निर्देशन दिए। बैठकमा ऊर्जा, जलस्रोत तथा सिँचाइ मन्त्री शक्तिबहादुर बस्नेत, उद्योग, वाणिज्य तथा आपूर्ति मन्त्री रमेश रिजाल, वन तथा वातावरण मन्त्री वीरेन्द्रप्रसाद महतो, मुख्यसचिव डा. बैकुण्ठ अर्याल, निजी क्षेत्रका विज्ञ सदस्यहरू भवानी राणा, हरिभक्त शर्मा र राजेशकाजी श्रेष्ठ लगायत नेपाल सरकारका उच्च पदस्थ अधिकारीहरूको उपस्थिति थियो।साभार सेतोपाटी
