बर्दिया,असोज २९ (माउण्टेन) /आजको विज्ञान र प्रविधिको युगमा दुनियाको हरेक क्षेत्रमा नवीन युगको सूत्रपात भईरहेको छ । पत्रकारिता क्षेत्र पनि यसबाट अलग रहन सम्भव छैन, विज्ञान र प्रविधीको विकासले पत्रकारितामा नवीन युगको क्षितिज उधारिदिएको छ । छापा पत्रकारिता र विद्युतीय पत्रकारिता हुदै आज संचार माध्यम डिजिटल युगमा प्रवेश गरिरहेका छन् । पत्रकारिता क्षेत्रमा जति नयाँ प्रवृतिहरु भित्रिएका छन् । त्यतिकै मात्रामा अवसर र चुनौतिका चाङहरुसमेत हाम्रा सामु देखापरेका छन् । यस क्षेत्रमा देखापरेका सम्भावना र चुनौतीहरुलाई आत्मसाथ गदै हामी बर्दियाको पत्रकारितामा नवीन पत्रिका शुभारम्भ गरिरहेका छौं ।
बर्दिया पत्रकारिताको विकासको यात्रा अपेक्षित रुपमा समृद्ध हुन सकेको छैन । संख्यात्मक रुपमा छापा पत्रिका, रेडियो र अनलाइन पत्रिकाको लहर देखा परेतापनि गुणस्तरीयताका दृष्टिले बर्दियाको पत्रकारिता अझै संघर्षरत नै छ । बर्दियामा पत्रकारिताको विकासमा यस अघि भएका साथै प्रयासहरुको हामी हार्दिकता पूर्वक सम्मान गर्दछौ र ती सबैबाट शिक्षा लिदै नयाँ गन्तव्यमा पुग्नका लागि हामीले हाम्रो यात्रा प्रारम्भ गरेका छौं ।
मुलुकमा हाल विद्यमान शासन व्यवस्था जन संघर्षबाट स्थापित भएको हो । जनताको अथह बलिदानबाट आज हामी संघिय लोकतान्त्रिक गणतन्त्रको अभ्यास गरिरहेका छौं । गाउँगाउँमा स्थानीय सरकारको उपस्थिती छ । तर त्यसको अनुभूति नागरिकलाई भएको छ कि छैन ? नागरिकका आवाजहरु बुलन्द भएर उठिरहेका छन् कि छैनन ? ती आवाजहरुलाई स्थानीय सरकारहरुले सुनेका छन् कि छैनन् ? ती कुराहरु पनि आज मननीय भएर उपस्थित छन् ।
सरकारले जनआवाजहरुको उपेक्षा गर्दा जनतामा निराशा उत्पन्न हुने र त्यो निराशाबाट कालान्तरमा व्यवस्था प्रति नै वितृष्णा बढ्ने खतरासमेत हाम्रा सामु छ । यी सबै कुराहरुलाई मध्य नजर गर्दै स्वस्थ समाज निर्माण गर्न प्रभावकारी संचार माध्यमको स्थापना आजको आवश्यकता हो । यही आवश्यकता बोध गर्दै हामी–पत्रकारिताको यो यात्रामा प्रवेश गरेका छौं । आशा छ हाम्रो यात्रामा पाठक महानुभावहरुको सकारात्मक साथ रहनेछ ।
