बर्दियाको मधुवन नगरपालिका वडा नं ६ को गुराँस नमूना माध्यमिक विध्यालयमा हात्ती मेरो साथी विध्यालय इको क्लबको आतिथ्यतामा आज आइतबार हात्ती सचेतना हाजिरी जवाफ प्रतियोगिता सम्पन्न भएको हो।
मधुवन नगरपालिका अन्तर्गत रहेका १० वटा माध्यमिक विद्यालयहरुको सहभागिता रहेको हाजिरी जवाफ प्रतियोगितामा गुराँस नमूना माध्यमिक विद्यालय मधुवन नगरपालिका वडा नं ६ प्रथम स्थान भएको छ भने त्रिभूवन माध्यमिक विद्यालय मधुवन नगरपालिका वडा नं १ सूर्यपटुवा द्वितीय, मञ्जुश्री बाल बाटीका माध्यमिक विद्यालय मधुवन नगरपालिका वडा नं २ बगालिपुर तृतीय स्थान प्राप्त गरेको छ ।
हाजिरी जवाफ प्रतियोगितामा नेपाल राष्ट्रिय नमूना माध्यमिक विद्यालय मधुवन नगरपालिका वडा नं ४ ढोढरी ले सान्तवना प्राप्त गरेको थियो । हाजिरी जवाफ प्रतियोगितामा प्रथम स्थान हुने विद्यालयले नगद ५ हजार मेडल प्रमाणपत्र प्राप्त गरेको थियो भने द्वितीय हुने विद्यालयले नगद ४ हजार रुपैया र मेडल प्रमाणपत्र, तृतिय हुने विद्यालयले नगद ३ हजार रुपैया र मेडल प्रमाणपत्र र सान्तवना प्राप्त हुने विद्यालयले नगद २ हजार रुपैया र मेडल प्रमाणपत्र मधुवन नगरपालिकाका नगर प्रमुख तेज बहादुर भाटले हस्तान्तरण गर्नुभएको थियो।
जर्मन कर्पोरेशन, ग्लोवल नेचर फन्ट, आई.यु.सी.एन., एन.ई.डब्लु.एस., खाता सामुदायीक वन समन्वय समिती मधुवन नगरपालिका वडा नं ३ बर्दिया र उज्यालो नेपाल ठाकुर बाबा नगरपालिका वडा नं १ भुरिगाँउ बर्दियाको सहयोग समन्वय र सहकार्यमा हाजिरी जवाफ प्रतियोगिता संचालन भएको थियो।
हाजिरी जवाफ कार्यक्रममा सम्बोधन गर्दै नगर प्रमुख तेज बहादुर भाटले विद्यार्थीहरुलाई ठूलो मान्छे बन्ने कि असल मान्छे बन्ने भनी प्रश्न गर्दै मधुवन नगरपालिकाका शिक्षा शाखा प्रमुखलाई निर्देश दिँदै स्थानीय पाठ्यक्रममा बाघ,हात्ती,गैँडा जस्ता वन्यजन्तुका आनीबानी, कसरी बच्ने भने कुरा अनिवार्य समावेश गर्नुपर्ने जरुरी देखिएको हुनाले यस तर्फ विशेष जोड दिन मधुवन नगरपालिका शिक्षा शाखालाई अनुरोध गर्नुभयो । विद्यार्थीहरु मार्फत मानव हात्ती सह अस्तित्वका लागि सचेतना अभी वृद्धिका लागि यस्ता किसिमका सन्देश मुलक कार्यक्रमले राम्रो प्रभाव पार्ने आयोजकले जानकारी दिएका छन ।
उज्यालो नेपालका अध्यक्ष नवराज न्यौपानेको सभापतित्वमा सम्पन्न कार्यक्रममा मधुवन नगरपालिकाका नगरप्रमुख तेज बहादुर भाट, उपप्रमुख अनिता चौधरी, बर्दिया राष्ट्रिय निकुञ्जका संरक्षण अधिकृत विश्व बाबू श्रेष्ठ, मधुवन नगरपालिका शिक्षा शाखा प्रमुख नारायण पोख्रेल, हात्ती मेरो साथी संयोजक धनिराम चौधरी, उज्यालो नेपालका स्वयमसेवक रमेश कुमार थापा , विद्यालय व्यवस्थापन समितिका अध्यक्ष लाल बहादुर खत्री, विभिन्न विद्यालयका इको शिक्षकहरू लगायत हात्ती मेरो साथीका गाँउ टोल संयोजकहरु, हात्ती मेरो साथी विद्यालय इको क्लब का विद्यार्थीहरु उपस्थिति रहेको थियो।
