बर्दियाको बढैयातालमा अन्तरपुस्ता संवाद तथा सकारात्मक यौनिकता सम्बन्धी कार्यक्रम सम्पन्न भएको छ । प्लान इन्टरनेशनल नेपालको सहयोग तथा बाँके युनेस्को क्लब अन्तर्गत “सशक्त बालिका परियोजनाले कार्यक्रम आयोजना गरेको हो ।
कार्यक्रमको उद्देश्य अघिल्लो पुस्ता र पछिल्लो पुस्ताबीच सहज संवाद स्थापनागर्दै यौनिकतालाई स्वास्थ्य र अधिकारसँग जोडिएको सकारात्मक दृष्टिकोणमा बुझाउने र युवापुस्तालाई जिम्मेवार तथा सशक्त बनाउन सहयोग गर्नु रहेको बताईएको छ । अभिमुखीकरण कार्यक्रममा अन्तरपुस्ता संवादको अर्थ, महत्व र आवश्यकता, पुस्तान्तरणमा देखिने चुनौतीहरू, ज्ञान–सिप, कला, संस्कार र संस्कृतिको संरक्षण तथा हस्तान्तरणका उपाय बारे छलफल भएको थियो ।
पुस्तान्तरणलाई व्यवसायसँग कसरी जोड्ने, नयाँ पुस्तालाई कसरी आकर्षित गर्ने भन्ने विषयमा समेत सहभागीहरूले विचार राखेका थिए । यौनिकताको परिभाषा, सकारात्मक यौनिकताको महत्व, यौन तथा प्रजनन स्वास्थ्य अधिकारका विषयमा पनि सहजीकरण गरिएको थियो । बढैयाताल गाउँपालिका वडा नम्बर ७ का कार्यवाहक अध्यक्ष कृष्ण बहादुर क्षेत्रीको अध्यक्षता भएको कार्यक्रममा परियोजनाका अधिकृत विजय शर्माले कार्यक्रमको औचित्यबारे प्रष्ट पानुभएको छ ।
उहाँले पुस्ताबीचको ज्ञान–सिप आदान–प्रदानलाई केवल औपचारिक तहमा सीमित नराखी अनौपचारिक भेला, समूह, परिवार र समुदाय स्तरमै निरन्तर संवाद गर्नुपर्नेमा जोड दिए । साथै, हानिकारक अभ्यास हटाउँदै सकारात्मक संस्कारलाई पुस्तान्तरण गर्न आवश्यक रहेको उहाँको भनाइ थियो ।
कार्यक्रमका सहभागी धार्मिक सञ्जाल बढैयातालका संयोजक बुद्धीराज लम्साल, वडा नं. ७ का बरघर पर्शुराम थारू, ९ का बरघर चन्द्र बहादुर थारू लगायतले आफ्ना भनाई राख्नु भएको थियो ।
युवा सञ्जाल बढैयातालकी संयोजक स्वस्तिका खड्का लगायतले सिकेका ज्ञान शिपलाइ समुदाय स्तरमा सचेतनाको रूपमा बिस्तार गर्ने प्रतिबद्धता जनाएका छन् । कार्यक्रममा वडा नं ७ का किशोरी क्लब, बरघर, धार्मिक गुरू, नागरिक समाजका प्रतिनिधि, युवा सञ्जाल, स्थानीय महिला समूह लगायतको सहभागिता रहेको थियो । कार्यक्रमको सहजीकरण दल सुनारले गर्नुभएको परियोजनाका सुपरभाइजर रामबहादुर थारूले जानकारी दिनुभयो ।
